საკითხის კენჭისყრაზე გატანის ინიციატივით "ნაციონალური მოძრაობა" 18 მარტის ბიუროს სხდომაზე გამოვიდა.
როგორც ფრაქცია "ერთიანი ნაციონალური მოძრაობის" თავმჯდომარემ რობერტ ჩხაიძემ განაცხადა, ავთანდილ ბერიძის ავტომობილის ირგვლივ ატეხილი აჟიოტაჟის გამო მთელი რეგიონი გაილანძღა. მისივე განმარტებით, უმაღლესი საბჭოს თავმჯდომარე, რომელიც იუმორისტული გადაცემების გმირად იქცა, რეგიონის პირველ პოლიტიკურ პირად არ უნდა ითვლებოდეს.
ავთანდილ ბერიძის გადაყენების ინიციატივას "ნაციონალური მოძრაობის" რვავე წევრი უჭერს მხარს, აჭარის უმაღლესი საბჭოს თავმჯდომარის გადაყენებას კი კენჭისყრაზე 21 დეპუტატიდან მინიმუმ, თერთმეტმა უნდა დაუჭიროს მხარი.
ხვალ, 12:00 საათზე დაგეგმილ პლენარულ სხდომაზე ფარული კენჭისყრით გაირკვევა ავთანდილ ბერიძე თანამდებობაზე დარჩება თუ არა. თუკი საკითხი ჩავარდება, უმაღლესი საბჭოს რეგლამენტის თანახმად, საკითხის კენჭისყრაზე კიდევ ერთხელ გატანა ექვსი თვის შემდეგ გახდება შესაძლებელი.
