სოციალურ ქსელში გავრცელებული გარდაცვლილ ზურაბ ჟვანიასა და რაულ იუსუპოვის ფოტომასალასთან დაკავშირებით, ზურაბ ჟვანიას ძმამ გოგლა ჟვანიამ „პრაიმერთან" სატელეფონო ინტერვიუში ისაურა.
- ბატონო გოგლა, სატელევიზიო ინტერვიუში განაცხადეთ, რომ კადრები, რომელიც გავრცელდა უკვე ნანახი გქონდათ, სად და როდის ნახეთ ვიდეო, რომელიც რამდენიმე საათის წინ გავრცელდა?
- გამოძიების პროცესში ვნახე.
- არსებობს კიდევ კადრები, რომელიც საზოგადოებას არ აქვს ნანახი?
- ამ კითხვაზე მე პასუხის გაცემა არ შემიძლია, დასრულდება გამოძიება და საზოგადოება ყველაფერს გაიგებს.
- უკვე რამდენიმე წელია, რაც ბატონ ზურაბს ჟვანიას გარდაცვალების გამოძიება მიმდინარეობს და ჯერაც არ გახსნილა, თქვენ გაქვთ იმის იმედი, რომ გაიხსნება?
- ხელისუფლების ცვლილების შემდეგ გამოძიება ინტენსიურად მიმდინარეობს, უკმაყოფილო ნამდვილად არ ვარ, იყო შეფერხებები პროკურორების ცვლილებების გამო, მაგრამ საბოლოდ ვფიქრობ, რომ გამოძიება მალე და ობიექტურად დასრულდება.
- ყოფილ ხელისუფლებას ადანაშაულებთ გამოძიების შეფარხებაზე?
- მე არავის არ ვადანაშაულებ, ყველა ყველაფერს ხედავს და ამ თემაზე მეტი საუბარი არ მინდა.
- კადრებს, რომელიც გავრცელდა, ეწერა „სააკაშვილმა მოკლა ჟვანია", თქვენი აზრით, რას ნიშნავს ეს? რამე კავშირშია ექსპრეზიდენტი ზურაბ ჟვანიას მკვლელობასთან?
- ვერ გეტყვით, გამოძიების დასრულებას დაველოდოთ და ყველაფერი მაშინ იქნება ნათელი.
- თქვენი აზრით, ვის შეეძლო გაევრცელებინა ეს ვიდეო, ვის ინტერესებში შედიოდა?
- არ ვიცი, აზრზე არ ვარ და არც მიზანი არ ვიცი ამ ვიდეოს გავრცელების.
- ამბობენ, რომ ამ ვიდეოს გავრცელებით ივანიშვილის და მარგველაშვილის სკანდალი გადაფარეს, თქვენ როგორ ფიქრობთ?
- არა მგონია ასე იყოს, კავშირს ვერ ვხედავ!
შეგახსენებთ, რომ „YouTube"-ზე გუშინ ყოფილი პრემიერ-მინისტრის ზურაბ ჟვანიასა და რაულ იუსუპოვის ცხედრების ამსახველი ფოტომასალა გავრცელდა. კადრების ავთენტურობა ჯერჯერობით დადგენილი არ არის. მასალა „YouTube"-ზე ჰაკიმ ფაშას სახელითაა ატვირთული.
