მეტეოროლოგიის მსოფლიო დღესთან დაკავშირებით, დღეს, ქუთაისში ავტომატურ რეჟიმში მომუშავე ახალი მეტეოროლოგიური სადგური გაიხსნება. სადგურის გახსნას გარემოსა და ბუნებრივი რესურსების დაცვის მინისტრის მოადგილე ირაკლი ნოზაძე, გარემოს ეროვნული სააგენტოს უფროსის მოადგილე ნიკოლოზ ალხაზაშვილი და ქუთაისის სადგურის უფროსი ავთანდილ კუჭუხიძე დაესწრებიან.
გარემოსა და ბუნებრივი რესურსების დაცვის სამინისტროს გარემოს ეროვნული სააგენტო მეტეოროლოგიის დღეს ყოველწლიურად აღნიშნავს. წელს მეტეოროლოგიის საერთაშორისო დღე ქუთაისში ახალი, თანამედროვე სტანდარტების შესაბამისი მეტეოსადგურის გახსნით აღინიშნება. უწყების ცნობით, ახალი, ავტომატური სადგური შესაძლებლობას იძლევა გაუმჯობესდეს სტიქიური ჰიდრომეტეოროლოგიური მოვლენების შესახებ, ადრეული გაფრთხილების სისტემა, ასევე, ამინდის პირობების უფრო ოპერატიულად შეფასება და მიღწეულ იქნას უფრო მაღალი სიზუსტით პროგნოზირება.
საქართველო ჩართულია მეტეოროლოგიურ მონაცემთა გაცვლის მსოფლიო სისტემაში. მსოფლიოს მეტეოროლოგიურ ორგანიზაციას სადღეღამისო რეჟიმში 3 საათში ერთხელ მიეწოდება ინფორმაცია სხვადასხვა ქვეყნიდან, მათ შორის საქართველოს 14 მეტეო სადგურიდან. აღნიშნული მონაცემების საფუძველზე დგება გლობალური მასშტაბის ამინდის პროგნოზები, რომლებიც ვრცელდება CNN-ით და მასმედიის სხვა საშუალებებით.
23 მარტი მეტეოროლოგიის დღედ 1950 წელს მსოფლიო მეტეოროლოგიური ორგანიზაციის დაარსების შესახებ კონვენციის ძალაში შესვლასას გამოცხადდა. ამინდის მსოფლიო სამსახურის ძირითად კომპონენტს დედამიწაზე, ზღვაზე, ჰაერში და კოსმოსურ სივრცეში მეტეოროლოგიურ პარამეტრებზე დაკვირვების გლობალური სისტემა წარმოადგენს. ამ სისტემაში გაერთიანებულია მმო-ს (მსოფლიო მეტეოროლოგიური ორგანიზაცია) წევრი 191 ქვეყანა, მათ შორის - საქართველო. წლევანდელი მსოფლიო მეტეოროლოგიური დღის თემაა "ამინდი და კლიმატი- ახალგაზრობის ჩართულობა".
ახალი მეტეოროლოგიური სადგურის გახსნა 12:00 საათისთვის არის დაგეგმილი.
