ქუთაისის მერია სოციალურად დაუცველ ოჯახებს მოხმარებული ელექტროენერგიის საფასურს დაუფარავს. ქალაქის მერის მოვალეობის შემსრულებელის შოთა მურღულიას თქმით, ერთსულიან და ორსულიან ოჯახებს აუნაზღაურდება 36 ლარი, სამ, ოთხ და ხუთწევრიან ოჯახებს 54 ლარი, ექვს და შვიდწევრიან ოჯახებს 72 ლარი, რვა და მეტ წევრიან ოჯახებს კი 90 ლარი.
„ამ პროექტზე სამი თვე ვმუშაობდით. თბილისის გარდა, მსგავსი პროექტი საქართველოს არცერთ ქალაქში არ არის. ვფიქრობ, ეს დიდი შეღავათი იქნება ჩვენი სოციალურად დაუცველი ოჯახებისთვის, აღნიშნული პროექტისთვის 300 000 ლარი გამოიყოფა, რომელიც ადმინისტრაციული ხარჯების შემცირების გამო გამოგვითავისუფლდა, ეს პროექტი 0-დან 70 000-მდე რეიტინგული ქულის მქონე ოჯახებზე განხორციელდება“, - აცხადებს ქალაქის მერის მოვალეობის შემსრულებელი.
