საქართველოს სახალხო დამცველმა საქართველოს მთავრობას ახალციხის რაიონის სოფელ ტატანისში არსებულ პირობებთან დაკავშირებით წინადადებით მიმართა.

“2014 წლის 27 თებერვალს სახალხო დამცველის წარმომადგენლები იმყოფებოდნენ ახალციხის რაიონის სოფელ ტატანისში, სადაც ადგილზე მოხდა სოფელში არსებული პრობლემების გაცნობა.

ადგილზე სიტუაციის გაცნობისა და საკითხის შესწავლის შედეგად გამოიკვეთა მთელი რიგი კომპლექსური პრობლემები. სოფელი ტატანისი მდებარეობს ახალციხის ქვაბულში და განლაგებულია ზღვის დონიდან 1300 მეტრის სიმაღლეზე. იგი რაიონული ცენტრიდან 10 კილომეტრის დაშორებით მდებარეობს. სოფელში ამჟამად 197 ადამიანი ცხოვრობს.

სოფლამდე მისასვლელი გზის 10 კილომეტრიანი მონაკვეთი დაზიანებულია რაც ზამთრისა და უამინდობის პირობებში მას გაუვალს ხდის.

განსაკუთრებით საგანგაშოა სოფელში დაწყებით სკოლაში არსებული პირობები. სკოლის შენობა ამორტიზებულია, სასწავლო ინვენტარი და ინფრასტრუქტურა კი დაზიანებული რაც ხელისშემშლელი ფაქტორია სასწავლო პროცესის სრულყოფილად წარმართვისთვის. სასკოლო ასაკის მოსწავლეებს სრული ზოგადი განათლების მიღება კი მხოლოდ 4 კილომეტრით დაშორებულ მეზობელ სოფელში შეუძლიათ.

აღსანიშნავია, რომ სოფელში მწვავე პრობლემად დგას სასმელი წყლით უზრუნველყოფის საკითხი. მოსახლეობა განმარტავს, რომ ისინი მხოლოდ წვიმისა და სასმელად უვარგისი მღვრიე წყლით სარგებლობენ.

გარდა ამისა, სოფელში არსებული რთული ინფრასტრუქტურული მდგომარეობიდან გამომდინარე, უამინდობაში შეუძლებელია სასწრაფო სამედიცინო დახმარების ჯგუფის გამოძახება. სოფელს არ აქვს ამბულატორია, აფთიაქი, ასევე სოფელში არ არსებობს მაღაზია რის გამოც მოსახლეობას არ აქვს წვდომა პირველადი მოხმარების საგნებზე.

საქართველოს სახალხო დამცველმა წინადადებით მიმართა საქართველოს მთავრობას, გაითვალისწინოს ახალციხის რაიონის სოფელ ტატანისში შექმნილი მძიმე ვითარება და უზრუნველყოს მაქსიმალურად მჭიდრო ვადებში მოსახლეობისთვის ადეკვატური დახმარების გაწევა”, - აღნიშნულია განცხადებაში.

(მოამზადა თეონა რამაზაშვილმა)