„ქრისტიან-დემოკრატიული მოძრაობის“ ლიდერი, პრეზიდენტობის კანდიდატი, გიორგი თარგამაძე აცხადებს, რომ გიორგი მარგველაშვილმა, განათლებისა და მეცნიერების მინისტრის პოსტზე ყოფნისას, რვა თვეში, ოთხი შეცდომა დაუშვა. როგორც პრესკონფერენციაზე გიორგი თარგამაძემ ჟურნალისტებთან თქვა, მარგველაშვილის პირველი შეცდომა არის სუსტი მენეჯმენტი – აგრარული უნივერსიტეტისთვის გაურკვეველი მიზეზებით აკრედიტაციის ჩამორთმევა და სტუდენტების პროტესტის ფონზე ისევ გაურკვეველ პირობებში გადაწყვეტილების შეცვლა და აკრედიტაციის აღდგენა; მეორე შეცდომად გიორგი თარგამაძე უსამართლობას ასახელებს. „კერძო საკუთრების, კერძოდ, საავტორო უფლებებისა და ინტელექტუალური საკუთრების ხელყოფა: სახელმძღვანელოების გამო დაპირისპირება გამომცემლებთან და ავტორებთან, სამინისტრომ აღიარა შეცდომა და ბრიტანულ გამომცემლობას ურიცხავს 3.5 მილიონ დოლარს, თუმცა ჯერ კიდევ გაურკვეველია 18 ქართული გამომცემლის ბედი; არაგუნდური ქცევა – როზა ლუქსემბურგის „შრომის კოდექსი“, რომელიც მთავრობის სხდომაზე მოიწონეს და იქ მარგველაშვილს ხმა არ ამოუღია, თუმცა ცოტა ხანში ზურგს უკან აკრიტიკებდა გუნდის წევრებს; არაპრინციპულობა – უმაღლესი განათლების შესახებ კანონში შესატანი ცვლილებების განხილვის დროს, მარგველაშვილმა ვერ დაიცვა საკუთარი პოზიციები საკუთარ გუნდის წევრებს შორისაც კი, შედეგად კანონპროექტი შეიცვალა და სადავო მუხლი ამოვარდა“, – აღნიშნა თარგამაძემ.