„ყველა ის ადამიანი, რომელიც მთელი ცხრა წლის განმავლობაში ამ პოლიტიკას განსაზღვრავდა, იქნება ბოლომდე დასჯილი“, - ეს განცხადება გააკეთა პრემიერ-მინისტრმა ირაკლი ღარიბაშვილმა დადიანების სასახლეში ადგილობრივ მოსახლეობასთან შეხვედრისას.
მისი თქმით, წინა ხელისუფლების ყველა დანაშაული კარგად ახსოვთ და მათ ბოლომდე გამოიძიებენ.
„ცხრა წლის განმავლობაში, სამწუხაროდ, 320 000 ადამიანი იქნა გასამართლებული. ათასობით ადამიანი იქნა მორალურად განადგურებული, პატივაყრილი. უდანაშაულო ადამიანებს საკუთარი სახლებიდან იტაცებდნენ, აუპატიურებდნენ რაღაც აბსურდული დანაშაულის აღიარების მიზნით. დღეს ადამიანები გამოდიან და საუბრობენ დემოკრატიაზე, ადამიანის უფლებებზე, ჭკუას გვარიგებენ, როგორ მოვაწყოთ სახელმწიფო - ეს არის ყველაზე დიდი უსამართლობა მეგობრებო და მე მინდა, ამ ადამიანებს შევახსენო, ამ ყველაზე დიდ უმცირესობას, რომ ჩვენ ყველას კარგად გვახსოვს და ყველა ამ მძიმე დანაშაულს ბოლომდე გამოვიძიებთ“, -აღნიშნა პრემიერ-მინისტრმა.
