ბათუმის სასტუმრო "შერატონში" გამართულ შეხვედრაზე ბათუმის მერის კანდიდატად გიორგი დიასამიძე დასახელდა, რომელმაც განაცხადა, რომ გამოცდილებას ბათუმის აღმშენებლობისთვის გამოიყენებს.
ცნობილი გახდა, რომ პარტიული სიის პირველი ნომერი ბათუმის საკრებულოს ყოფილი თავმჯდომარე გიორგი კირთაძე იქნება. მისი განმარტებით, მერობის კანდიდატების შესარჩევად ბათუმში პრაიმერი არ ჩატარდა, რადგან პარტიას მხოლოდ ერთი კანდიდატი ჰყავდა. გიორგი კირთაძე გუნდთან ერთად ამომრჩეველს "ბათუმის ამუშავებას" ჰპირდება.
"იმედი მაქვს, გაჩერებული ბათუმი თვითმმართველობის არჩევნების შემდეგ ამუშავდება. ორი წლის წინ ჩვენ მიერ ფულთან ერთად დატოვებული პროექტები ამათ ვერც კი გააგრძელეს. ჩვენ არა მარტო იმას გავაკეთებთ, არამედ ბევრ საინტერესო სიახლეს შევთავაზებთ ბათუმს და ბათუმი იქნება ბევრად უფრო „მაგარი“ ქალაქი, ვიდრე დღეს არის", - აღნიშნა გიორგი კირთაძემ.
ბათუმის საკრებულოს მაჟორიტარი დეპუტატების კანდიდატების ათკაციანი სიიდან რვის ვინაობა უკვე ცნობილია. კანდიდატთა უმრავლესობა ახალი სახეებია, ისინი "ნაციონალურ მოძრაობას" ბოლო პერიოდში შეუერთდნენ. მაჟორიტართა შორის ერთ-ერთი ქალაქის ყოფილი მერი ირაკლი თავართქილაძეა.
კანდიდატების პრეზენტაციას "ნაციონალური მოძრაობის" თბილისის ორგანიზაციის თავმჯდომარე გიგი უგულავა და გენერალური მდივანი მიხეილ მაჭავარიანი ესწრებოდნენ.
