სოციალურად დაუცველ ქალებს, რომლებიც სამედიცინო პროგრამებით ვერ სარგებლობენ, „ბათუმის სამშობიარო სახლი“ უფასოდ მოემსახურება. შეთანხმებას აჭარის ჯანმრთელობისა და სოციალური დაცვის მინისტრმა ნუგზარ სურმანიძემ და სამშობიაროს დირექტორმა ლამარა ჩაზმავამ დღეს მოაწერეს ხელი.
შეთანხმების თანახმად, სამედიცინო დაწესებულება თავისი პროფილის მიხედვით, სამინისტროს მოთხოვნის საფუძველზე, პაციენტებს სამედიცინო მომსახურებას ანაზღაურების გარეშე გაუწევს. გაწეული სამედიცინო მომსახურების ხარჯები ერთი წლის განმავლობაში არ უნდა აღემატებოდეს 5 000 ლარს.
„გარკვეული კატეგორიის ადამიანები, რომლებსაც აქვთ ქულა, მაგრამ იმ მომენტისათვის არ სარგებლობენ კონკრეტული სახელმწიფო პროგრამით და სჭირდებათ დახმარება, ჩვენი მიმართვის საფუძველზე ბათუმის სამშობიარო სახლში მომსახურებას უფასოდ მიიღებენ. შეიძლება ნაწილობრივ დაფინანსებაზეც შევუთანხმდეთ“, - განმარტა აჭარის ჯანდაცვის მინისტრმა „ბათუმელებთან“ საუბარში.
(მოამზადა ლილუ მიროტაძემ)
