„ზღვის შელფზე და ხმელეთზე, ნავთობის საბადოების დაზვერვის დასაწყებად ვემზადებით“-განაცხადა დე-ფაქტო აფხაზეთის მარიონეტული რეჟიმის ლიდერმა ალექსანდრ ანქვაბმა ჟურნალისტის კითხვაზე არის თუ არა აფხაზეთში ნავთობის საბადოები . ინფორმაციას „ინტერფაქსი“ ავრცელებს.
მისი თქმით, აუცილებელია გაიგონ რა მოცულობისა და ხარისხის ნავთობის რეზერვები არსებობს აფხაზეთის ტერიტორიაზე.
„დღეს საქმე სიტუაციის შესწავლას, საბადოების სავარაუდო ადგილის გამოკვლევას ეხება. თუ კვლევის შედეგები დადებითი იქნება, მაშინ მომდევნო ეტაპზე-ნავთობის მოპოვებაზე იქნება საჭირო გადასვლა. თუ ნავთობს ვერ ამოვიღებთ, მაშინ ამას ვჩვენი არაკეთილისმსურველი საქართველო გააკეთებს. რატომ უნდა დავუთმოთ მათ ჩვენი რესურსი?“-განაცხადა ალექსანდრე ანქვაბმა.
მისი თქმით, თბილისმა ნავთობის მოპოვების ლიცენზიები ერთ-ერთ ამერიკულ კომპანიას მიჰყიდა.
სპეციალისტთა პროგნოზით, აფხაზეთის საზღვაო შელფზე ნავთობის მარაგი დაახლოებით 300-350 მლნ ტონაა.
