„ნაციონალური მოძრაობა" საზოგადოებრივ მაუწყებელთან დაკავშირებით შექმნილი მდგომარეობის გამო ხელისუფლებას აკრიტიკებს. საპარლამენტო უმცირესობის წევრმა სერგო რატიანმა ჟურნალისტებთან საუბარში განაცხადა, რომ ტელევიზიასთან დაკავშირებით პარადოქსული ვითარებაა შექმნილი.
,,მთავრობის გაუაზრებელმა პოლიტიკამ "საზოგადოებრივ მაუწყებელთან" დაკავშირებით მიგვიყვანა იმ პარადოქსულ მდგომარეობამდე, როდესაც კანონმა განსაზღვრა, რომ "საზოგადოებრივი მაუწყებლის" სამეთვალყურეო საბჭოში უნდა იყოს 9 წევრი, მაგრამ საკონსტიტუციო სასამართლომ შვიდს უფლებამოსილება აღუდგინა. უკვე არჩეულია ოთხი წევრი და კიდევ ასარჩევია 7 წევრი. ამ ქვეყანაში ბავშვებმაც კი იციან, რომ 15 ნამდვილად არ უდრის 9-ს, მაგრამ მთავრობამ ეს ვერ გაარკვია და დღეს გვაქვს სიტუაცია, როდესაც წევრთა რაოდენობამ შეიძლება გადააჭარბოს იმ რაოდენობას, რაც განსაზღვრულია კანონის მიხედვით. საპარლამენტო უმცირესობა მთავრობას სთავაზობს, რომ წავიდეთ რიგითობის პრინციპით. მას შემდეგ რაც მაუწყებლის ძველ წევრებს შეუწყდებათ უფლებამოსილება, დაემატოს ახალი", - განაცხადა სერგო რატიანმა.
დღევანდელ პლენარულ სხდომაზე პარლამენტი „საზოგადოებრივი მაუწყებლის" სამეურვეო საბჭოში ვაკანტურ ადგილებზე ხუთი წევრის დამტკიცებას შეეცდება. კანდიდატები სხვადასხვა პოლიტიკური ძალის მიერ არიან წარდგენილები. სამეურვეო საბჭოს წევრობის კანდიდატები არიან გიორგი კოხრეიძე, ნინია კაკაბაძე, დავით კიზირია, გრიგოლ გოგელია და ალექსანდრე ვახტანგოვი.
