საქართველოს შინაგან საქმეთა სამინისტრო იმედოვნებს, რომ საოკუპაციო ხაზთან დაკავებულ ქართველები უახლოეს პერიოდში გათავისუფლდებიან. შინაგან საქმეთა სამინისტროს ანალიტიკური დეპარტამენტის უფროსის გოჩა რატიანის ინფორმაციით, ხაშურის რაიონის სოფელ კლდისწყაროს ორი მკვიდრი - ბესიკ გელაშვილი და გიორგი ხარაიშვილი, ასევე სოფელ წერონისიდან გაუჩინარებული მერაბ კაპანაძე რუსმა სამხედროებმა 3 დღის წინ დააკავეს და ამჟამად ცხინვალის იზოლატორში არიან გადაყვანილი.

„დაგვიდასტურეს ინფორმაცია მათი დაკავების შესახებ. ჩვენი მხრივ, ვმუშაობთ ამ საკითხზე ყველა რესურსით, რაც გაგვაჩნია. ცალ-ცალკე არ განვიხილავთ ამ შემთხვევებს, ერთიანად ვმუშაობთ და მოლოდინი გვაქვს, რომ მათ უახლოეს პერიოდში გაათავისუფლებენ“, - განაცხადა გოჩა რატიანმა.