უკრაინელმა მომღერალმა ივანა მელაიმ საქართველო დატოვა, როგორც მომღერალი ambebi.ge-სთან ინტერვიუში აცხადებს, მოსკოვშია და იქ აპირებს კარიერის გაკეთებას. სულ ცოტა ხნის წინ დიმა ბილანმა „Instagram"-ზე მასთან ერთად გადაღებული ფოტოები ატვირთა. ჟურნალისტის შეკითხვაზე, რა ურთიერთობა აქვს ცნობილ მომღერალთან, მელაი პასუხობს, რომ დიმა უბრალოდ მისი მეგობარია და მისი და გურამიკო ლომიძის რომანს საფრთხე არ ემუქრება.
„დიმა ბილანი ჩემი მეგობარია, კავკასიური სული აქვს. თბილი და ტკბილი ურთიერთობა გვაქვს. ერთმანეთი 2-3 წლის წინ ბაქოში გავიცანით და დავმეგობრდით. ერთნაირი მუსიკალური გემოვნება გვაქვს, მოსწონს მაია კაჭკაჭიშვილის და ბორიკო შხიანის მიერ შექმნილი სიმღერა.
მოსკოვში სად ვცხოვრობ, ამის შესახებ ცოტა ადამიანმა იცის. ერთ-ერთი შეხვედრიდან დაბრუნების შემდეგ, კონსიერჟმა მითხრა - თქვენთან საჩუქარი დატოვესო. გამიკვირდა. როცა საჩუქარი ვნახე და გავიგე, ვინ გამომიგზავნა, შოკში ჩავვარდი. უძვირფასესი საჩუქარი იყო. ასეთი ნივთები აუქციონებზე თუ შეგხვდებათ, ძალიან ძვირადღირებული. ალბათ, არავინ იტყოდა უარს ასეთ ძვირფას საჩუქარზე, მაგრამ მე დაკავებული გოგონა ვარ, გვერდით მყავს საყვარელი მამაკაცი და როგორც ნამდვილმა ქალმა, უარი ვთქვი ამ საჩუქარზე. ამის მიუხედავად, ყველაფერი კარგად გვაქვს მე და გურამიკოს", - აცხადებს ის.
უკრაინელი მომღერალი ივანა მელაი საქართველოში სვანეთში ახალი წლის ღამეს კონცერტის შემდეგ გადმოსახლდა. მასზე და ექს-პრეზიდენტ სააკაშვილის მეგობრობაზე ხშრად იწერებოდა პრესაში. ჭორები მას შემდეგ გააქტიურდა, რაც მომღერლის ინტერპოლით ძებნილმა მამამ, საქართველოს პრეზიდენტის ბრძანებით, საქართველოს მოქალაქეობა მიიღო, შედეგად დღეს ივანას ოჯახი საქართველოში ცხოვრობს. ინტერესი მომღერლის მაშინაც გაიზარდა, როდესაც პარლამენტარმა ირინა იმერლიშვილმა სხვა დოკუმენტებთან ერთად აღმოაჩინა ჩანაწერი, რომლის თანახმადაც, მიხეილ სააკაშვილმა მას 982 ლარად ღირებული სამკაული სახელმწიფო ხაზინის ხარჯზე უყიდა.
