„ნაციონალურ მოძრაობაში" მართლაც არიან კრიტიკულად განწყობილი ადამიანები, მეც დიდი ხნით ადრე მივხდი, რომ პარტია ფატალურ შეცდომებს უშვებდა, რაც ჩვენს შორის დაპირისპირების მიზეზიც გახდა. იგივე აზრზეა ჩემი ძმაც" - ამის შესახებ მიხეილ მაჭავარიანის ძმამ, ექსპერტმა ვანო მაჭავარიანმა გაზეთ „ვერსიისთვის" მიცემულ ინტერვიუში განაცხადა. როგორც მან აღნიშნა, მიხეილ მაჭავარიანი პარტიაში მიმდინარე პროცესებს საკმაოდ პრაგმატულად უყურებს - „სანამ ბიძინა ივანიშვილი პოლიტიკაში გამოჩნდებოდა, თავად „ნაციონალური მოძრაობის" წევრები ხვდებოდნენ, რომ მნიშვნელოვან საკითხებზე არასერიოზული მიდგომით როგორც პარტიას, ისე ქვეყანასაც ზიანს აყენებდნენ. კარგად ვიცი, შიგნით იყო კიდეც საკმაოდ სერიოზული საუბარი ახალი პარტიის შექმნაზე ან კოალიციური მართველობის ჩამოყალიბებაზე, თუმცა მაშინ პარტიაში გადაწყვეტილებების მიმღებმა პირებმა ჩათვალეს, რომ ეს არასწორი ნაბიჯი იქნებოდა " - განაცხადა ვანო მაჭავარიანმა. მისი თქმით, „ნაციონალურ მოძრაობას" განსაკუთრებული ზიანი მეგის ქარდავას მსგავსა ადამიანებმა მიაყენეს, რომელსაც თურმე მინი საქართველო ჰქონდათ შექმნილი.
ვანო მაჭავარიანმა ისაუბრა მასსა და ბიძინა ივანიშვილს შორის არსებულ ურთიერთობაზეც და აღნიშნა, რომ მას ივანიშვილმა არჩევნებამდე საკმაოდ დიდი თანამდებობა შესთავზა - „როცა ბიძინა ივანიშვილს არჩევნებამდე შევხდი და მან პარტიაში საკმაოდ მაღალი თანამდებობა შემომთავაზა, ჩემთან მოვიდა წინა მოწვევის პარლამენტის ერთ-ერთი დეპუტატი და მეგობრულად მითხრა, კარგად დაფიქრდი, ახალაიებისთვის ეს ნაბიჯი რასაც ნიშნავსო. თუმცა უარი ამიტომ არ მითქვამს, მიზეზი გახლდათ ის, რომ ჩემი ძმა „ნაციონალურ მოძრაობაში" აქტიურად იყო ჩართული და უხერხულობა შეიქმნებოდა" - განაცხადა ვანო მაჭავარიანმა.
