პლანეტის პირველობისთვის ბრძოლას მთელი მსოფლიო მოუთმენლად ელის. 2014 წლის მუნდიალზე 32 საუკეთესო გუნდი იასპარეზებს. „რეპორტიორი“ წარმოგიდგენთ მათ და შევეცდებით საკმაო ინფორმაცია მოგაწოდოთ ყველა გუნდის შესახებ.
დღევანდელი ჩვენი სტუმარი D ჯგუფში განთელისი ურუგვაის ნაკრებია, რომელსაც შემდეგ ეტაპზე გასასვლელად კოსტა რიკის, ინგლისისა და იტალიის ნაკრებებთან თამაში მოუწევს. ურუგვაელებს ოსკარ ტაბარესი წვრთნის, რომელმაც წინა ჩემპიონატზე გუნდი ნახევარფინალში გაიყვანა, 2011 წელს კი - კოპა ამერიკა მოაგებინა.
„სამი მილიონის ოცნება... წინ ურუგვაი!“ - ურუგვაელთა 2014 წლის სამუნდიალო სლოგანი.
ურუგვაის ნაკრები შესარჩევ ჯგუფში არც ისე დამაჯერებელი იყო. მათ პირველ ადგილზე ეკვადორი გაუშვეს, თავად კი პლეი ოფში იორდანიას დაუპირისპირდნენ. ამ ბარიერის გადალახვა ტაბარესის გუნდს ნამდვილად არ გასჭირვებია და პირველ მატჩში გამანადგურებელი ანგარიშით - 5:0 იმარჯვა. მეორე შეხვედრა უბრალო ფორმალობა იყო - 0:0.
თავისუფლად შეიძლება ითქვას, რომ ურუგვაის ვარსკვლავური შემადგენლობა ჰყავს. თითოეულ პოზიციაზე ევროპის დიდ გუნდებში მოასპარეზე ფეხბურთელებს ვხედავთ. განსაკუთრებით შთამბეჭდავია შეტევის ხაზი, რომელსაც „ლივერპულისა“ და „პსჟ“-ს ლიდერები, სუარესი და კავანი ამშვენებენ. გასული მუნდიალის საუკეთესო მოთამაშე დიეგო ფორლანს კი სავარაუდოდ სათადარიგოთა სკამზე ჯდომა მოუწევს, ვინაიდან ტაბარესი 4-4-2 ტაქტიკას ანიჭებს უპირატესობას, თუმცა საჭიროების შემთხვევაში გუნდი ხშირად იყენებს 3-4-3 განლაგებას და აი, სწორედ აქ დაეხმარება გამოცდილი ფორლანი თავის გუნდს.
შეტევის ხაზთან შედარებით, დამაფიქრებელია დაცვის ცენტრი. ამ პოზიციებზე გოდინი და ლუგანო თამაშობენ. წესით ამ მხრივ პრობლემები არ უნდა იქმნებოდეს, მაგრამ შესარჩევ ციკლში ურუგვაიმ 16 მატჩში 25 გოლი გაუშვა (აღსანიშნავია რომ ამდენივე გაიტანა). ერთი სიტყვით, შესარჩევ ციკლზე არცთუ დამაჯერებელმა გამოსვლამ ეჭვქვეშ დააყენა გუნდის შესაძლებლობები 2014 წლის მუნდიალზე.
ოსკარ ტაბარესმა გაფართოებული, 25-კაციანი შემადგენლობა გაახმაურა:
მეკარეები: ფერნანდო მუსლერა („გალათასარაი“), მარტინ სილვა („ვასკო და გამა“), როდრიგო მუნიოსი („ლიბერტადი“).
მცველები: დიეგო ლუგანო („ვესტ ბრომვიჩი“), დიეგო გოდინი, ხოსე ხიმენესი („ატლეტიკო“), მარტინ კასერესი („იუვენტუსი“), მაქსი პერეირა („ბენფიკა“), ფუსილე („პორტუ“), სებასტიან კოატესი („ნასიონალი“).
ნახევარმცველები: ეხიდიო არევალო რიოსი („მორელია“), ვალტერ გარგანო („პარმა“), დიეგო პერესი („ბოლონია“), სებასტიან ეურგენი („პალმეირასი“), ალვარო გონსალესი („ლაციო“), ალეჰანდრო სილვა („ლანუსი“), ალვარო პერეირა („პორტუ“), კრისტიან როდრიგესი („ატლეტიკო“), გასტონ რამირესი („ბოლონია“), ნიკოლას ლოდეირო („ბოტაფოგო“).
თავდამსხმელები: ლუის სუარესი („ლივერპული“), ედინსონ კავანი („პსჟ“), დიეგო ფორლანი („სერესო ოსაკა“), კრისტიან სტუანი („ესპანიოლი“), აბელ ერნანდესი („პალერმო“).
ვინაიდან ურუგვაელ სპეციალისტს ჯერ არ დაუსახელებია 23-კაციანი საბოლოო შემადგენლობა, გთავაზობთ ჩვენი წარმოდგენით შექმნილ ძირითად შემადგენლობას:
კარს „გალათასარაის“ დარაჯი ფერნანდო მუსლერა დაიცავს. ცენტრალურ დაცვის ხაზში გოდინი და ლუგანო შეწყვილდებიან. მარჯვენა ფლანგს მაქსი პერეირა გააკონტროლებს, მარცხნივ კი კასერესი განთავსდება.
გარგანო საყრდენის პოზიციას დაიკავებს. მარცხენა ფლანგს სავარაუდოდ ალვარო პერეირა დაიკავებს, მარჯვნიდან კი შეტევებს კრისტიან როდრიგესი გააძლიერებს. შემტევ ნახევარმცველად სავარაუდოდ 21 წლის ძალიან პერსპექტიულ გასტონ რამირესს ვიხილავთ.
შეტევის ხაზში ყველაფერი ნათელია. ძირითად შემადგენლობაში ადგილს სუარესი და კავანი დაიკავებენ, საჭიროების შემთხვევაში კი მათ დიეგო ფორლანი და აბელ ერნანდესი დაეხმარებიან.
შეგახსენებთ, ურუგვაის ნაკრები D ჯგუფში ინგლისის, იტალიისა და კოსტა რიკას ნაკრებებს დაუპირისპირდება.
ურუგვაელთა კალენდარი ჯგუფურ ეტაპზე:
14 ივნისი 23:00 ურუგვაი - კოსტა რიკა (ფორტალეზა)
19 ივნისი 23:00 ურუგვაი - ინგლისი (სან პაულო)
24 ივნისი 20:00 იტალია - ურუგვაი (ნატალი)
