ჯანდაცვის მინისტრი დავით სერგეენკო დარიალის ხეობაში ვითარების ადგილზე გასაცნობად ჩავიდა. მისი თქმით, დაინტერესებულია გაიგოს, თუ რისი გაკეთება შეუძლია სამინისტროს მოსახლეობის დასახმარებლად.
“ჯანდაცვის სამინისტრო პირველივე წუთიდან მუდმივ კოორდინაციაში იყო. აქ იმყოფებიან ჩვენი თანამშრომლები, დეპარტამენტის ხელმძღვანელი. დღეს ჩამოვედი იმისთვის, რომ ადგილზე გავეცნო რეალურ საჭიროებებს. ჯანდაცვის საჭიროებები ამ დროისთვის არ ჩანს, ეს იყო პირველ საათებში, როდესაც ხდებოდა სამედიცინო ევკუაცია, პაციენტების გადაყვანა. ახლა ჯანდაცვითი საკითხები იმდენად აქტუალური არ არის. ჩემი ამოცანაა, რომ ვნახო, რამდენად აქვს ამას შეხება სოციალურ სფეროსთან და რითი შეგვიძლია ვიყოთ სასარგებლო ადგილობრივი მოსახლეობისთვის და მთლიანად ქვეყნისთვის”, - განაცხადა სერგეენკომ.
შეგახსენებთ, რომ დარიალის ხეობაში 17 მაისს მეწყერი ჩამოწვა, რომელსაც მსხვერპლი მოჰყვა. არიან დაკარგულები, რომელთა მოსაძებნადაც სამაშველო სამუშაოები გრძელდება.
