ექსპერტ ალექსანდრე თვალჭრელიძის თქმით, დიდი განსხვავებაა, რაც ხდებოდა „ნაციონალების" მმართველობისას და რაც ხდება დღეს. დღევანდელ და ყოფილ ხელისუფლებათა შორის განსხვავება ის არის, რომ ახლა ცდილობენ რეაგირება მოახდინონ და ფაქტებს არ ჩქმალავენ. როგორც მან „კვირის პალიტრასთან" ინტერვიუში განაცხადა, „ცენტრ პოინტი" კლასიკური ფინანსური პირამიდა იყო და კანონი უნდა აღსრულდეს.
„პირადად მეც, „ცენტრ პოინტის" მიერ დაზარალებული ვარ, მაგრამ ჯანდაბას ის 30 ათასი დოლარი - მირჩევნია, სამართლიანობა აღდგეს. არ მეშინია ვთქვა - „ცენტრ პოინტის" ბრუნვიდან ამოღებული დაახლოებით 50 მილიონი ლარი მოხმარდა მიხეილ სააკაშვილის ზრახვებს, მის საარჩევნო კამპანიებს თუ სხვა პროექტებს. როდესაც რუსუდან კერვალიშვილი პარლამენტის ვიცე-სპიკერი გახდა, მაშინ ვთქვი - ეს არ შერჩება-მეთქი. ასეც მოხდა. კომპანიის გარშემო განვითარებული მოვლენების მთავარი დირიჟორი მიხეილ სააკაშვილი იყო. ამაში დარწმუნებული ვარ და ეს მალე გამოჩნდება. არ გამოვრიცხავ, რომ სააკაშვილთან ერთად, სხვა მაღალჩინოსნების პასუხისმგებლობის საკითხიც დადგეს", - განაცხადა ექსპერტმა.
