სოციალური მომსახურების სააგენტოს აჭარის ფილიალის ხელმძღვანელი თემურ ქარცივაძე აცხადებს, რომ რვავე ბავშვი მახინჯაურში, წინასწარ მომზადებულ ადაპტირებულ ოჯახში მოთავსდა, თითოეული მოზარდის ზრუნვისთვის, ბავშვების ასაკის შესაბამისად, სახელმწიფოსგან ყოველთვიურად 600-დან 700 ლარამდე დახმარებას მიიღებს.
„სოციალურ მუშაკებთან ერთად, ოპერატიულად ჩავედით სოფელ ოჩხამურში და დავიწყეთ მუშაობა. ბავშვები უკვე განვათავსეთ მახინჯაურში წინასწარშერჩეულ, ადაპტირებულ ოჯახში. ამ ოჯახს არაერთგზის მიუღია და აღუზდრია ბავშვები. ამას ჰქვია გადაუდებელი მინდობით აღზრდა. ვიდრე ქობულეთში პოლიციამ თავისი საქმე დაასრულა და გამოგვატანა ბავშვები, ამ ოჯახმა ნამცხვრები გამოაცხო და დაახვედრა პატარებს. ანუ, სრულად მომზადებული შეხვდნენ ბავშვებს. პატარებს დიდი უბედურება გადახდათ თავს, თუმცა ოჯახში, სადაც ისინი გაიზრდებიან, ბევრად კარგი სოციალური პირობებია და ვიმედოვნებთ კარგად იქნებიან", - განაცხადა თემურ ქარცივაძემ.
ქარცივაძის თქმით ბავშვები კარგად გრძნობენ თავს.
„გარდა იმ მომენტისა, რაც მათ გადახდათ თავს, ბავშვები ამ ეტაპზე, აბსოლუტურად ნორმალურად არიან. უფროსი მეთოთხმეტე წელშია, ხოლო ყველაზე პატარა რვა თვისაა", - განაცხადა თემურ ქარცივაძემ.
