საქართველოს პრემიერ-მინისტრ ირაკლი ღარიბაშვილის განცხადებით, ინიციატივაზე, „აწარმოე საქართველოში", ბიზნესმენებისგან ძალიან კარგი გამოხმაურება მოისმინა. როგორც ირაკლი ღარიბაშვილმა ჟურნალისტებს ბიზნესმენებთან შეხვედრის შემდეგ განუცხადა, ამ პროექტთან დაკავშირებით ბიზნესმენებს დიდი მოლოდინი აქვთ.
„ამ პროექტში მათი ჩართულობა არის ძალიან მნიშვნელოვანი. ისინი მზად არიან, რომ მასში მიიღონ მონაწილეობა და ეს ძალიან მახარებს, ვინაიდან ბიზნესის და კერძო სექტორის ჩართულობის გარეშე შეუძლებელია სახელმწიფომ განავითაროს ეკონომიკა. ხშირად გვსაყვედურობენ ჩვენ, რომ არ იქმნება სამუშაო ადგილები და მთავრობა არ ქმნის სამუშაო ადგილებს. ამაზე მინდა განვმარტო, მთავრობა პირადად ვერ შექმნის სამუშაო ადგილებს, ეს უნდა შექმნას კერძო სექტორმა. მაგრამ, მთავრობა ქმნის ყველა პირობას იმისათვის, რომ შეიქმნას თავისუფალი გარემო, იყოს თავისუფალი ბიზნეს გარემო, ბიზნესი იყოს დაცული, იყოს დაცული საკუთრების ხელშეუხებლობა, ეს ყველა კომპონენტი ჩვენ უზრუნველყოფილი გვაქვს", - განაცხადა ღარიბაშვილმა.
პრემიერი მიიჩნევს, რომ ახლა მთავარია ბიზნესი უფრო მეტად იყოს ჩართული სახელმწიფოს მშენებლობაში და ამის წინაპირობა და ნიშნები უკვე ჩანს. კითხვაზე, დღევანდელ შეხვედრაზე იყო თუ არა გადასახადებზე საუბარი, პრემიერმა განაცხადა, რომ ამ თემაზე არ უსაუბრიათ და ეს საკითხი დღის წესრიგში არ დგას.
„ჩვენ გვაქვს ერთ-ერთი ყველაზე ეფექტური და მოქნილი საგადასახადო სისტემა და მე ვფიქრობ, რომ ამ ეტაპზე ამ მიმართულებით რაიმე ცვლილება არ იგეგმება", -აღნიშნა ღარიბაშვილმა.
