ტელეკომპანია „მაესტროს“ საინფორმაციო გამოშვების წამყვანი, მაკა ცინცაძე, დატვირთული დღის რეჟიმის შემდეგ თავისუფალ დროს ოჯახს და მეგობრებს უთმობს. მისთვის საუკეთესო ემოციების მიზეზი შვილი, ორი წლის და ათი თვის კესოა. მაკა ცინცაძე „რეპორტიორს“ ესაუბრება.
__ მაკა, ამ ეტაპზე „მაესტროს“ საინფორმაციო გამოშვების წამყვანი ხართ. რა პასუხისმგებლობა და სირთულე ახლავს საინფორმაციო ეთერის წაყვანას?
_ ალბათ სხვა საქმის მსგავსად, ტელევიზიაში მუშაობაც რთულია- დიდ დროს და ენერგიას მოითხოვს. თუმცა ეს სოციუმი ერთგვარი ნარკოტიკია, მუდმივი ადრენალინი, წინასაეთერო ღელვა, მზადების პროცესი, შეზღუდულ დროში ყველაფრის მოსწრება და რაც მთავარია, ობიექტურობისა და მიუკერძოებლობის შენარჩუნება. რთულია, როცა მუდმივად გადატვირთული ხარ, თუმცა თუ რეალიზებული ხარ - საქმის კეთებაც გსიამოვნებს.
__ ეს პროფესია იმიჯში შეზღუდვას ითვალისწინებს?
_ ბუნებრივია ითვალისწინებს - სტუდიაში ვერ ან არ შეხვალ სპორტული მაისურით. შენ პირველ რიგში მაყურებლის აზრს ითვალისწინებ, საეთეროდ შეუსაბამო ვიზული კი მგონი, არამარტო საკუთარი თავის, არამედ მაყურებლის უპატივცემულობაც არის.
__ მანამდე გადაცემის წამყვანი იყავით, ასე გაგიცნოთ მაყურებელმა. თუ მოიაზრება მომავალში რომელიმე საავტორო გადაცემის წამყვანად თქვენი ხილვა?
_ ამ ეტაპზე, საავტორო გადაცემას არ ვგეგმავ. თუმცა პერსპექტივაში ყველაფერი შესაძლებელია .
__ რა მოგწონთ და არ მოგწონთ თანამედროვე საინფორმაციო გამოშვებებში, რას დაამატებდით ან შეცვლიდით?
_ სასურველია მეტი ანალიტიკა და გაუმჯობესებული ტექნიკური რესურსი. ვერავის გავაკრიტიკებ, ყველას საკუთარი არჩევანი და კონცეფცია აქვს. რა მომწონს? მომწონს როდესაც ჟურნალისტი საკუთარ ფუნქციას არ ივიწყებს - მასალის მოძიება, გაანალიზება, რეალობის დადგენა და გასაჯაროება, განსაკუთრებით სამი სახელისუფლებო შტოს - აღმასრულებელი, საკანონმდებლო და სასამართლოსთვის თვალყურის დევნება. ჩვენ უნდა ვისაუბროთ ფაქტებზე, მოვახერხოთ საზოგადოების სრულად, ობიექტური ინფორმაციის ხარჯზე ინფორმირება. მაყურებლის უფლებაა მოვლენა დამოუკიდებლად გაანალიზოს. ჟურნალსიტის ფუნქცია რეპორტაჟის საკუთარი შეხედულებისამებრ გაშლას არ გულისხმობს, მან მაყურებლამდე მხოლოდ ფაქტები უნდა მიიტანოს. ჩვენი ფუნქცია მხოლოდ კრიტიკაც არ არის, თუმცა -არც ქება. ხელისუფლება ვალდებულია, საქმე აკეთოს, ამიტომ ხოტბის შესხმას ნუ მოგვთხოვენ. საზოგადოება მათ საქმიანობისთვის ანაზღაურებას უხდის.
__ მაკა, რამდენად ადვილია თქვენთვის იყოთ პროფესიულად დაკავებული და რეალიზებული, ამავდროულად -დედა და მეუღლე? როგორ ანაწილებთ დროს?
_ ეს პრობლემაა. ვცდილობ ყველაფერი მოვასწრო, თუმცა ვინც ამბობს, რომ ყველაფერს სრულად ასწრებს, მგონი ეს რეალობას არ უნდა შეესაბამებოდეს. ვცდილობ ვმართო ჩემი ყველაზე ძვირადღირებული რესურსი, თუმცა რაღაცის დათმობა მაინც მიწევს.
__ ინტელექტუალურ შოუში, „რა? სად? როდის?“ იღებდით მონაწილეობას. ეს პერიოდი როგორ გახსენდებათ?
_ ეს პერიოდი ძალიან კარგად მახსენდება, იმის მიუხედავად, რომ საკუთარი შესაძლებლობების ერთი პროცენტიც კი ვერ გამოვავლინე. რაც მთავარია შევიძინე ახალი, ძალიან კარგი მეგობრები და გავიცანი უამრავი საინტერესო ადამიანი.
__ როცა თავისუფალი დრო გაქვთ, როგორ ატარებთ მას, რას ანიჭებთ უპირატესობას?
_ როცა თავისუფალი დრო მაქვს, უპირატესობას, ყველაზე ლამაზ გოგოსთან - კესოსთან ყოფნას ვანიჭებ. კესო ორი წლისა და ათი თვისაა. ჩვენ ვსეირნობთ, ვთამაშობთ და ვერთობით.
__ ზაფხული თუ დაგეგმეთ?
_ ჯერ ნამდვილად არაფერი დამიგეგმავს. ერთი რაც ზუსტად ვიცი, კესო უნდა წავიყვანო მთაში და შემდეგ ზღვაზე. უკვე დიდი გოგოა.
__ რა ეტაპია თქვენს ცხოვრებაში, როგორ შეაფასებთ მას?
_ ჩემი ცხოვრება ყველაზე საინტერესო ეტაპზეა- ვზრუნავ ერთ, პატარა, ლამაზ გოგოზე, რომლის დაბადებამაც სრულად შემცვალა-გავხდი ჰიპერსენსიტიური, განსაკუთრებით ბავშვების მიმართ, პასუხისმგებლობის გრძნობა გაათმაგდა და ვარ ბედნიერი, რადგან სამსახურის მერე სახლში ის მელოდება.
მაკა ცინცაძე ჟურნალისტურ სფეროს ჩვიდმეტი წლიდან დაუკავშირდა. პროფესიით ეკონომისტი, ეკრანზე გამოჩენისთანავე ერთ-ერთ მომხიბვლელ წამყვანად დასახელდა.
