მომღერალი ნუკა კვალიაშვილი, რომელიც ცნობილი მომღერლის ეკა კვალიაშვილის შვილია. ნუკა საზოგადოებამ კონკურს „საქართველოს ვარსკვლავიდან" გაიცნო, სადაც ფინალისტიც გახდა, თუმცა ამჟამად ნუკას დროებითი პაუზა აქვს აღებული და ახლადშეძენილ შვილს უვლის. პარალელურად ცდილობს მიძინებული ხმა გამოაღვიძოს და აქტურად მიხედოს  კარიერას. „რეპორტიორს" ნუკა ბავშვობაზე, დედის როლზე მის მუსიკოსად ჩამოყალიბებაში და სამომავლო გეგმებზე ესაუბრა.

- როგორი ბავშვი იყავი და სიმღერა როგორ დაიწყე?

-  ვიყავი ცელქი ბავშვი, მაგრამ არასოდეს მიყვარდა რამის გაფუჭება, არც ვაბრაზებდი ჩემს მშობლებს. ენერგიით სავსე და ხალისიანი ბავშვი ვიყავი. როგორც დედა მომიყვა, პირველად 7 თვის ასაკში წამიღიღინია. მითხრა, ეგრევე მივხვდი რომ იმღერებდიო. რაც თავი მახსოვს, სულ ვმღერი და სიმღერით არასდროს ვიღლები.

- თუ გყავდა შენი ფავორიტი მომღერალი და თუ გიფიქრია, რომ მომავალში მისი მსგავსი კარიერა გინდოდა რომ გქონოდა?

- პატარა რომ ვიყავი, ძალიან მომწონდა ქრისტინა აგილერა, მაგრამ ახლა სხვა ფავორიტი მყავს - დიდი სიამოვნებით მექნებოდა ბიონსეს მსგავსი კარიერა.

- რა როლი შეასრულა დედამ - ეკა კვალიაშვილმა შენი, როგორც მომღერლის ჩამოყალიბებაში?

- დედამ მუსიკალურად დამხვეწა. თავისუფალ დროს  მუსიკაში მამეცადინებდა, ხმას მამუშავებინებდა და ახლა როგორიც ჩამოვყალიბდი, დედის დამსახურებაა, რომელსაც დიდ მადლობას ვუხდი და ძალიან მიყვარს!

- ეკა როგორ არის, მკურნალობა როგორ მიდის და მიიღო თუ არა საბოლოოდ მისი მკურნალობისთვის შეგროვილი თანხა?

-ეკას რაც ეხება, კომენტარს არ გავაკეთებ ჯერ-ჯერობით. ამ თემაზე თვითონ იტყვის ყველაფერს.

-ერთ-ერთ ინტერვიუში ამბობდი, რომ მამამ ბავშვი როცა შემეძინა, არც კი მომილოცაო. ახლა როგორი ურთიერთობა გაქვს მამასთან?

-მამასთან დამილაგდა ურთიერთობა და ხშირად ვეკონტაქტებით ერთმანეთს.

-რას ფიქრობ კონკურსებზე, რომელიც საქართველოში ტარდება და რამდენად აქვს გემოვნება ქართველ მაყურებელს, რომელიც გამარჯვებულებს სმს-ებით და ზარებით ავლენს...

- ვფიქრობ, საქართველოში კონკურსები იმისთვისაა კარგი, რომ ხალხმა გაგიცნოს და შეგაფასოს. მსოფლიო აღიარება რომ მოიპოვო, როგორც ეს საზღვარგარეთ ხდება, მაგის შანსი თითქმის არ არსებობს. მიხარია, რომ ამდენი ნიჭიერი ადამიანი გვყავს და უფრო მეტად გამეხარდება, თუ მეტი ხელშეწყობა ექნებათ. გემოვნებაზე არ დავობენ, ასე რომ, არ მაქვს უფლება ხალხის გემოვნება შევაფასო. ყველა ადამიანი ინდივიდია, ინდივიდუალური გემოვნებით.

- რა არის საქართველოში აუცილებელი, რომ წარმატებული მომღერალი იყო?

- პირველ რიგში უნდა მოსწონდე მასას, მეორე - ძალიან კარგად უნდა მღეროდე.

-რა გეგმები გაქვს, რაზე მუშაობ და მიუხედავად იმისა, რომ შენი დღე მთლიანად ეთმობა პატარა შვილის აღზრდას, რის გაკეთებას ასწრებ?

-ჩემს გეგმებზე წინასწარ არასოდეს ვსაუბრობ. როდესაც განვახორციელებ, მაშინ გაიგებს ყველა. სახლში ვმეცადინეობ, მიძინებულ ხმას ვაღიძებ და კიდევ უფრო და უფრო ვხვეწავ. ვახერხებ თავის მოვლას, ფორმაში ყოფნას და ა.შ.