ქუთაისი საქართველოს დამოუკიდებლობის დღის აღნიშვნას ბაგრატის ტაძრიდან დაიწყებს. ქუთაისის სახელმწიფო ანსამბლი „მრავალჟამიერს" შეასრულებს. მოეწყობა საბრძოლო ხელოვნების ჩვენება.
პარალელურ რეჟიმში პირველად ქუთაისში, ცენტრალურ მოედანზე დაიწყება ფოლკლორის ფესტივალი. ფესტივალის მონაწილეები 40 წუთიანი პროგრამის შემდეგ, ქალაქის ცენტრალურ ნაწილში აღლუმს მოაწყობენ. აღლუმში მონაწილებას მიიღებენ სხადასხვა ქვეყნიდან მოწვეული სტუმრები. ხოლო დღის სამ საათზე ქალაქის ცენტრალურ მოედანზე შეკრებილები წუთიერი დუმილით პატივს მიაგებენ საქართველოს ერთიანობისთვის ბრძოლაში დაღუპულთა ხსოვნას.
ქალაქის ცენტრალურ ნაწილში დაგეგმილია სხვადასხვა კულტურული, სპორტული და გასართობი ღონისძიება. აკაკი წერეთლის უნივერსიტეტი დღის 1 საათზე უმასპინძლებს უნივერსიტეტის პროფესორ-მასწავლებლების, სტუდენტების, საჯარო სკოლების მოსწავლეებისა და ბავშვთა სოფლის აღსაზრდელების ხელნაკეთი ნიმუშების გამოფენას.
დღის ერთ-ერთი ყველაზე მნიშვნელოვანი ღონისძიება კი ფალიაშვილის ქუჩაზე დაიწყება. ფალიაშვილზე დღის მეორე ნახევრიდან მოეწყობა მძიმე ტექნიკის, არტილერიის, ოპტიკური შეიარაღებისა და სხვა სამხედრო ტექნიკის გამოფენა. წელს საქართველოში სამხედრო აღლუმი არ გაიმართება. ტექნიკის დემონსტრირებას მხოლოდ გამოფენის ხასიათი ექნება.
26 მაისის ღონისძიებებს საღამოს ცხრა საათზე ფეიერვერკი და ადგილობრივი და მოწვეული შემსრულებლების კონცერტი დაასრულებს.
