საქართველოს პრემიერ-მინისტრი რეგიონული ტურნეს ფარგლებში „ბორჯომის" N1 ჩამომსხმელი ქარხნის რეაბილიტაცია-რენოვაციის პროცესს გაეცნო. ირაკლი ღარიბაშვილს კომპანია „IDS ბორჯომი - საქართველოს" გენერალურმა დირექტორმა ზაზა კიკვაძემ უმასპინძლა და განუმარტა, რომ ქარხნის რენოვაცია, შესაძებლობას იძლევა თანამედროვე ტექნოლოგიური ხაზების გამოყენებით, გაიზარდოს პროდუქციის წარმოება 450 მლნ ბოთლამდე წელიწადში.

2014 წელს, გასულ წელთან შედარებით წარმოების 35%-ით გაზრდა იგეგმება. ასევე კომპანიის გათვლით, 2014 წელს ექსპორტი 75 მილიონით იზრდება, შიდა ბაზარზე დაგეგმილი ზრდა კი 5 მილიონს შეადგენს.

საქართველოს პრემიერ-მინისტრის თქმით, სასიამოვნოა, როდესაც კომპანიები მუდმივად ზრუნავენ ტექნოლოგიურ განახლებაზე და თავიანთ საქმიანობაში ინოვაციურ მიდგომებს ამკვიდრებენ.

ირაკლი ღარიბაშვილმა განაცხადა, რომ ქვეყანაში ბიზნეს კლიმატის სტაბილურობა ხელს უწყობს დიდ კომპანიებს, განახორციელონ დამატებითი ინვესტიციები, გააფართოონ ბიზნესი, დაასაქმონ მეტი ადამიანი და „ბორჯომის" ქარხანა ამის ნათელი მაგალითია.

„ბორჯომის" განახლებული ქარხნის გახსნა ივნისში იგეგმება. კომპანიაში დასაქმებულთა 95% ადგილობრივი მკვიდრია.