ეკონომიკის ექსპერტი, ემზარ ჯგერენაიას ინფორმაციით ხუდონჰესის მასშტაბის პროექტებს ყველა ქვეყანაში აზრთა სხვადასხვაობა ახლავს. ექსპერტის აზრით, საქართველოსთვის ხუდონჰესის მშენებლობა აუცილებელია.

"ხუდონჰესი, ეს არის ის პროექტი, რომელიც აუცილებლად უნდა განხორციელდეს. ხუდონჰესის აშენება არა მარტო ენერგოდამოუკიდებლობას გაზრდის, არამედ ხელს შეუწყობს რეგიონის განვითარებას. გარდა ამისა, ხუდონჰესი სჭირდება ქვეყნის ეკონომიკას. ამაზე არაერთხელ მისაუბრია და კიდევ ვიტყვი, რომ ამ პროექტით გათვალისწინებულია ბაზისური ელექტროსადგურის მშენებლობა, რაც საქართველოს ძალიან სჭირდება. ეკონომიკური ზრდის პირობებში, 5 წლის შემდეგ, საქართველოს 35%-ით მეტი ელექტროენერგია დასჭირდება, ამ სიმძლავრის მიღწევისთვის კი, ქვეყანას მეორე მძლავრი, ბაზისური ჰესი სჭირდება", - აცხადებს ჯგერენაია.

ჯგერენაიას აზრით შიში ე.წ „უცნობ" ინვესტორებზე, არასერიოზულია. ექსპერტი განმარტავს, რომ გახსნილია ყველა ინფორმაცია და ინვესტორებს საქართველოში ძალიან ცნობილი წარმომადგენელიც ჰყავთ დავით მირცხულავას სახით, რომელთანაც ყველა ინფორმაციის გადამოწმება შესაძლებელია.