არსებობს თუ არა რუსეთის მიერ ქართულ პროდუქციაზე მორიგი ემბარგოს დაწესების საფრთხე? მსგავსი რისკების შესახებ ქართველ მეწარმეებს შორის ინფორმაცია უკვე ვრცელდება. Commersant.ge-ს ინფორმაციით, მათი ნაწილი რუსულ ბაზარზე პროდუქციის ექსპორტისგან თავშეკავებას ამჯობინებს, ნაწილი კი ამ მიმართულებით ექსპორტს ამცირებს და ბაზრის დივერსიფიკაციის პოლიტიკას აძლიერებს.
სოკოს მწარმოებელი კომპანიის „თეთრი ქუდის“ წარმომადგენლის განცხადებით, მეწარმეებს შორის ვრცელდება ინფორმაცია, რომ ევროპასთან ასოცირების ხელშეკრულების გაფორმების შემდეგ, რუსეთი საქართველოს მორიგ ემბარგოს დაუწესებს. ასევე ცნობილია, რომ რუსეთმა ამ მიზეზით საკუთარ ბაზარზე პრობლემები უკვე შეუქმნა მოლდოველ ექსპორტიორებს.
მოსალოდნელ რისკებთან დაკავშირებით საქართველოს მთავრობაში კონკრეტული პასუხი არ აქვთ, თუმცა, როგორც გამოცემას პრემიერ-მინისტრის პირადმა წარმომადგენელმა რუსეთთან ურთიერთობის საკითხებში, ზურაბ აბაშიძემ განუცხადა, ქართველმა ბიზნესმენებმა დღევანდელ სამყაროში სიტყვა „გარანტია“, რომელიც ასე ძალიან უყვართ, უნდა დაივიწყონ.
„გარკვეული რისკფაქტორი მთელს მსოფლიოში არსებობს, ამას ჩვენ ვერ შევცვლით. რისკი ბიზნესის ნაწილია და ეს გათავისებული უნდა ჰქონდეთ, თუმცა უნდა შევეცადოთ, მაქსიმალურად შევამციროთ ეს რისკები, მათ შორის, წმინდა სავაჭრო–ეკონომიკური თვალსაზრისით“, - აღნიშნა მან.
რისკების შემცირების გათვალისწინებით, აბაშიძე მიესალმება ექსპორტიორთა პოზიციას ბაზრების დივერსიფიკაციის შესახებ. მისი თქმით, ექსპორტიორთა სურვილი, რომ ერთ ბაზარზე არ იყვნენ დამოკიდებულები, სწორი მიდგომაა და ეს დამოკიდებულება შენარჩუნებული უნდა იყოს.
აბაშიძის განცხადებით, მთავრობის მთავარი ამოცანაა საქართველოსთვის გაიხსნას ევროპის 500-მილიონიანი ბაზარი და ამავდროულად, რუსეთთან შენარჩუნებულ იქნას ლიბერალური სავაჭრო ურთიერთობები, რაც ქართულ ბიზნესს დიდი არჩევანის საშუალებას მისცემს.
„არჩევანი კი უფრო მეტ ჟანგბადს შემოიტანს ჩვენს ბიზნესში“, - დასძინა მან, თუმცა აღნიშნა, რომ რეალური გზა მხოლოდ მაშინ გამოჩნდება, როცა საქართველო ხელს მოაწერს ევროპასთან ასოცირების ხელშეკრულებას.
საქართველო ევროკავშირთან ასოცირების ხელშეკრულებასა და ღრმა და ყოვლისმომცველი თავისუფალი ვაჭრობის შესახებ შეთანხმებას 27 ივნისს აწერს ხელს. თუ როგორ აისახება რუსულ-ქართულ ურთიერთობებზე აღნიშნული ხელშეკრულების გაფორმება, ამის შესახებ ზურაბ აბაშიძემ კომენტარი რუსულ მედიასთანაც გააკეთა. „ჩვენ მივიღეთ მკაფიო სიგნალები, რომ მოსკოვში მშვიდად უყურებენ ჩვენს მიერ ევროკავშირთან შეთანხმების ხელმოწერას. ჩვენ გვეუბნებიან, რომ არავითარ ზეწოლას არ უნდა ველოდოთ. ჩვენ ამის იმედი გვაქვს“,- განაცხადა აბაშიძემ რამდენიმე კვირის წინ რუსულ მედიასთან საუბრისას.
