ე.წ. სამხრეთ ოსეთის დე ფაქტო პრეზიდენტი ლეონიდ თიბილოვი არ გამორიცხავს, რომ სამხრეთ ოსეთი რუსეთის შემადგენლობაში შევიდეს.
„ჩვენ, სამხრეთ ოსეთში, ყირიმის რუსეთის შემადგენლობაში დაბრუნებას სიხარულით შევხვდით. მოხარულები ვართ, რომ ყირიმი როგორც იქნა, სამშობლოს დაუბრუნდა. რაც შეეხება ჩვენს ურთიერთობას რუსეთთან, ძალიან მჭიდრო კავშირები გვაქვს. სამხრეთ ოსეთის რესპუბლიკის ტერიტორიაზე იმყოფება რუსეთის მე-4 სამხედრო ბაზა, გვაქვს დახმარება რუსეთის მხრიდან. ეს ყველაფერი მეტყველებს სამხრეთ ოსეთის რუსეთის ფედერაციაში ინტეგრაციაზე. ინტეგრაცია კი რუსეთის ფედერაციის შემადგენლობაში შესვლისთვის სერიოზული მოსამზადებელი ეტაპია. ეს იდეა თითოეულ ჩვენგანში დევს. პერსპექტივაში სამხრეთ ოსეთის ხალხი ერთიანი უნდა იყოს. ეს ისტორიული მომენტი უნდა დადგეს. ჩვენ ამ გზაზე ვართ და რუსეთის შემადგენლობაში შესვლის იდეას კარგი პერსპექტივა აქვს”, - განაცხადა ლეონიდ თიბილოვმა.
მისი თქმით, რიგი პარტიები რუსეთის შემადგენლობაში შესვლასთან დაკავშირებით რეფერენდუმის ჩატარების ინიციატივით გამოდიან.
„ჩვენი ამოცანაა, შევარჩიოთ შესაბამისი მომენტი, როდესაც რუსეთის შემადგენლობაში შესვლის საკითხს აქტიურად დავაყენებთ. საკითხი რუსეთის ხელისუფლებამ უნდა გადაწყვიტოს, არსებობს იურიდიული საკითხები, რომელიც უნდა გადაწყდეს, რათა რუსეთის შემადგენლობაში შევიდეთ, თუმცა კიდევ ერთხელ გავიმეორებ, სამხრეთ ოსეთს ასეთი პერსპექტივა აქვს და ხელიდან არ გავუშვებთ მომენტს, რათა ეს საკითხი დადებითად გადაწყდეს“, - განაცხადა თიბილოვმა.
ე.წ. სამხრეთ ოსეთის დე ფაქტო პრეზიდენტის თქმით, შესაძლოა ახალმა პარლამენტმა რუსეთს თავის შემადგენლობაში შეყვანის თხოვნით მიმართოს.
„არ გამოვრიცხავ, რომ რუსეთს თავის შემადგენლობაში შეყვანის თხოვნით უკვე ახალმა პარლამენტმა მიმართოს, რომელსაც 8 ივნისს აირჩევენ. ასეა თუ ისე, ეს საკითხი რუსეთის წარმოადგენლებთან შეხვედრაზე განიხილება. ვიმეორებ, მივიჩნევთ, რომ სამხრეთ ოსეთის ხალხისთვის ეს ისტორიული მომენტი დადგება“, - განაცხადა ლეონიდ თიბილოვმა.
