წყალტუბოში ქართული ინვესტიციით აშენებული სასტუმრო „წყალტუბო პლაზა“ გაიხსნა. სასტუმროს გახსნას ეკონომიკისა და რეგიონული განვითარების მინისტრები და იმერეთის გუბერნატორი ესწრებოდნენ.
სასტუმროში, რომელსაც 80 ოთახი აქვს, ინვესტორმა 12 მილიონი ლარი ჩადო.
ხელისუფლების წარმომადგენლებმა დღესვე, მუნიციპალიტეტში მიმდინარე ინფრასტრუქტურული პროექტები მოინახულეს.
„მთელ კურორტზე მთლიანი ინფრასტრუქტურის თანამედროვე დონეზე მოწყობა იგეგმება. წყალტუბო ძალიან მნიშვნელოვანი კურორტია, რომელიც შემოსავლის წყარო გახდება. აქ დაისვენებს არა მხოლოდ ჩვენი ხალხი, სტუმრები მეზობელი ქვეყნებიდანაც ჩამოვლენ. ჩვენ ვგეგმავთ წყალტუბოში რკინიგზის სადგურის აღდგენას და რკინიგზით ბევრი ადამიანი ჩამოვა. კარგია, რომ აეროპოტრი ახლოს არის წყალტუბოსთან,“ - აცხადებს ეკონომიკის მინისტრი გიორგი კვირიკაშვილი.
წყალტუბოს მუნიციპალიტეტში მიმდინარე ინფრასტრუქტურული პროექტებისათვის 49 მილიონი ლარია გამოყოფილი. აქედან 16 მილიონის ათვისება მიმდინარე წელს მოხდება. ხოლო წყალტუბოში დაგეგმილი 10 ინფრასტრუქტული პროექტი 2015 წელს დასრულდება.
