„არასაპარლამენტო ოპოზიცია" არჩევნების სადამკვირვებლო მისიებს 18  ივნისს ახალქალაქში სხდომაზე დასწრებისკენ მოუწოდებს. როგორც კოალიციიდან „რეპორტიორს" აცნობეს, ახალქალაქის ოლქში ადგილობრივი თვითმმართველობის არჩევნების ტოტალურად გაყალბების გამო „არასაპარლამენტო ოპოზიციის" ოფისთან უამრავი ადამიანი შეიკრიბა, რომლებიც არჩევნების შედეგებს აპროტესტებენ.

შეკრებილებს სიტყვით მიმართეს „არასაპარლამენტო ოპოზიციის" ლიდერებმა კახა კუკავამ, მანანა ნაჭყებიამ და ადგილობრივმა ლიდერებმა. შემდეგ მიტინგის მონაწილეები ახალქალაქის საოლქო კომისიისკენ გაემართნენ. საოლქო კომისიისგან „არასაპარლამენტო ოპოზიციის" წარმომადგენლებმა მოითხოვეს ხვალ საოლქო კომისიის სხდომის დანიშვნა, რომელიც „არასაპარლამენტო ოპოზიციის" მიერ დაწერილ საჩივრებს განიხილავს.

როგორც საოლქო კომისიის თავმჯდომარე, ასმიკ მარანგოზიანმა განაცხადა, სხდომა ხვალ 18 ივნისს, 14:00 საათვისთვის არის დანიშნული.

„არასაპარლამენტო ოპოზიცია" მოუწოდებს ყველა სადამკვირვებლო მისიას, გამოაგზავნონ თავიანთი წარმომადგენლები  სხდომაზე დასასწრებად. მიტინგის მონაწილეებმა განაცხადეს, რომ ისინი ხვალ 2 საათვისთვის კვლავ შეიკრიბებიან საოლქო კომისიასთან და სამართლიან გადაწყვეტილებას მოითხოვენ.