თამარ მათიაშვილი პროფესიით ბიოლოგია. ჰობი, რომელმაც რამდენიმე წლის წინ გაიტაცა, დღეს უკვე მის საქმიანობად იქცა. ყაბალახებს, როგორც მოსახვევებს, თავიდან საკუთარი თავისთვის იკერავდა, შემდეგ მეგობრებისთვის, დღეს კი უკვე მისი ნახვა და შეძენა ნებისმიერ მსურველს შეუძლია. 

„მოიხვიე ყაბალახი“ ქალბატონი თამარის შექმნილი ბრენდია. ტრადიციულ ქართულ ყაბალახს საკუთარი ელემენტებიც შემატა. ფერებით გაამრავალფეროვნა და იანვრიდან აქტიურად დაიწყო ყაბალახების შექმნა. სოციალურ ქსელში გაკეთებულმა გვერდმა მალე მიიპყრო საზოგადოების ყურადღება და ნელ-ნელა მის მიმართ მოთხოვნაც გაიზარდა. არ ეგონა, თუ მისი ჰობი ასეთ მოწონებას დაიმსახურებდა და მომავალში საკუთარი სახელოსნოს შექმნას და გამოფენების გამართვასაც გეგმავს.