ამიერკავკასიაში უდიდესი - რუსთავის ავტობაზრობის ავტოდილერი, ვინმე მერაბი, გაზეთ „ალიასთან" ინტერვიუში აცხადებს, რომ ავტობაზრობას აზერბაიჯანის პრეზიდენტის ილჰამ ალიევის ცოლის - მეჰრიბან ალიევას ფირმა ყიდულობს.
„მაგარია ალიევი! მარნეულის ხალხს ვისზეც ეტყვის, ხმას იმას აძლევენ, ამათი პრეზიდენტი დღესაც ალიევია. ამბობენ, რომ ნახევარ საქართველოში წილები აქვს. მგონი, რუსთავის ავტობაზრობასაც ყიდულობენ. ასე ამბობენ ალიევის ცოლის ფირმააო. ჯერ-ჯერობით უკრაინელები სხედან აქ უფროსად და ისინი მართავენ, მაგრამ ეგეთი ხმა გამოვიდა, რომ აზერბაიჯანელების ხელში გადადის ეს ყველაფერიო.
დასაწყისში ვანო მერაბიშვილმა და უკრაინელებმა გააკეთეს აქაურობა. 20 მილიონი ჩაუდეს უკრაინის მხრიდან, მერე სიტუაცია რომ აირია, ვანომ წილი ამოიღო და წავიდა, როცა მიხვდა, რომ მთავრობა იცვლებოდა.
თუ მართლა გაიყიდა, კარგი მანქანა გაძვირდება და ნაავარიები და ძველი უკვე აქაურებსაც აღარ ენდომებათ. ალიევისთვის ეს მომგებიანი ბიზნესი იქნება, ეს იქნება „პრამეჟუტოჩნი" ბაზარი, აქედან გაიყვანს დიდძალ მანქანას. თან ეს ბაზრობა იყო ფულის „სტანოკი" და თუ კარგად აამუშავეს, დიდი ფული გაკეთდება", - აცხადებს ის.
