გაერთიანებული შტაბის ყოფილმა უფროსმა, გიგი კალანდაძემ, დღეს, ჟურნალისტებთან შეხვედრისას განაცხადა, რომ ჯარის კვებისთვის გათვალისწინებული 500 ათასი ლარიდან თანხის, მის მიერ მითვისება სიცრუეა. „ეს არის ტყუილი და მინიმუმ რაღაც სამართლებრივ ჩარჩოებში უნდა მოექცეს მინისტრი, სანამ ჩემს მუნდირს შეეხება და ასეთ ცილს დამწამებს".

გენშტაბის ყოფილმა უფროსმა ქვეყნის პრემიერსა და პრეზიდენტს მიმართა, ყურადღება გაამახვილონ რამდენიმე თვის წინ ტელეეთერში თავდაცვის მინისტრის მიერ გაკეთებულ ცრუ განაცხადებაზე, თითქოს მხოლოდ 13 ჯარისკაცი მოიწამლა.

„მოიწამლა რამდენიმე ასეული ჯარისკაცი. პირველი მოწამვლის ფაქტი მე-2 და მე-3 ბრიგადაში მოხდა. ერთი თვის შემდეგ მსგავსი ფაქტი მე-4 ბრიგადაში განმეორდა. ალასანია ამ შემთხვევებს მალავს. მეორე ფაქტი, საერთოდ არ გახმაურებულა. ჯარისკაცების მოწამვლის მიზეზი უხარისხო საკვებია", - განაცხადა გიგი კალანდაძემ.

გენშტაბის ყოფილმა უფროსმა აღნიშნა, რომ დღეს სამხედრო პოლიციაში იმყოფებოდა და ლოჯისტიკის სარდლის, გიორგი კერესელიძის მიერ, მის წინააღმდეგ მიცემული ჩვენება გააცნეს. „თითქოს ჩემი დავალებით, კერესელიძემ ზუგდიდის აქციის მოსაწყობად, უკანონოდ გამოყო საწვავი. ამ საკითხზე დღეს მოწმის სტატუსით დამკითხეს", - დასძინა გიგი კალანდაძემ.

მისივე თქმით, ლოჯისტიკის სარდალი გიორგი კერესელიძე სამხედრო პოლიციამ რამდენიმე თვის წინ ადამიანების ცემის გამო დააკავა. მან ეს დანაშაული აღიარა. შემდეგ თავდაცვის სამინისტროდან საეჭვო გარანტიები მიიღო და ციხიდან არა მარტო გაათავისუფლეს, თანამდებობაზეც დააბრუნეს.

კალანდაძემ მიმართა სამართალდამცველებს, მოიკვლიონ, რა მიზეზით შეწყდა ამ ადამიანზე საგამოძიებო მოქმედებები. გენშტაბის ყოფილი უფროსი გიგი კალანდაძე აპირებს, დაელოდოს სასამართლო გადაწყვეტილებას და შემდეგ სამართლებრივი გზით გააგრძელოს ბრძოლა აღნიშნულ პირთა მიერ მის წინააღმდეგ განხორციელებულ ქმედებებზე.