ბათუმში, თამარის დასახლების მცხოვრებლებმა პროტესტის ნიშნად, 40 წუთის განმავლობაში ბათუმი-თბილისის ცენტრალური მაგისტრალი გადაკეტეს.

აქციის მონაწილეები დასახლების გასწვრივ, ზღვის სანაპიროზე მცირე ზომის დაცული ნავსადგურის მშენებლობის შეჩერებას მოითხოვდნენ.

მოსახლეობასთან აჭარის უმაღლესი საბჭოს დეპუტატი მედეა ვასაძე მივიდა და იმ წერილის ასლი აჩვენა, რომელიც რეგიონის საკანონდებლო ორგანომ პრემიერს გადაუგზავნა.

ვასაძის განმარტებით, დეპუტატები ირაკლი ღარიბაშვილს სთხოვენ, სანაპიროს ამ მონაკვეთზე ნავსადგურის მშენებლობის მიზანშეწონილობა გადაიხედოს. ვასაძის თქმით, თუ ეს არ მოხდება, ის მოსახლეობის გვერდით დადგება.

„არავინ ყურადღებას არ გვაქცევს. გვართმევენ სანაპიროს. იქნებ ვინმემ გაგვარკვიოს, რაშია საქმე", - განაცხადა აქციის მონაწილემ ნატო კიკალიშვილმა.

დეპუტატ ვასაძის თქმით, აქციას შეესწრო ეკონომიკის მინისტრი, გიორგი კვირიკაშვილი.

„მას ნებართვა აქვს გაცემული ამ შენებლობაზე. ვფიქრობ, ყველაზე უპრიანი იქნებოდა მისი პასუხი", - განაცხადა მედეა ვასაძემ.