ანგარიშის "ადამიანის უფლებათა და თავისუფლებათა შესახებ 2013 წლის პირველი ნახევრის" პრეზენტაცია ორგანიზაციის თავმჯდომარე გიორგი ტუღუშმა დღეს გამართა. მისი ინფორმაციით, ამნისტიასთან დაკავშირებით ვენეციის კომისიამ პირდაპირ მიუთითა, რომ პროცესი კანონდარღვევით წარიმართა და უგულვებელყოფილი იქნა, როგორც კონსტიტუციის, ასევე საქართველოს კანონმდებლობის მოთხოვნები. მისივე განცხადებით, ზოგადად მთელი პროცედურა კანონის უზენაესობის პრინციპთან წინააღმდეგობაში მოვიდა. ამასთან, ანგარიშში ასევე საუბარი არის თბილისის მერიის მაღალჩინოსნებისა და ყოფილი პრემიერ-მინისტრის, ვანო მერაბიშვილის დაკავების ფაქტებთან დაკავშირებით. გიორგი ტუღუშის განცხადებით, ყოფილ პრემიერ-მინისტრთან დაკავშირებით, პროკურატურის არგუმენტი, რომლის თანახმად აუცილებელი იყო აღმკვეთი ღონისძიების სახით წინასწარი პატიმრობის გამოყენება, არ იყო დამაჯერებელი. ტუღუშის განმარტებით, პროკურატურამ ვერ წარმოადგინა მყარი არგუმენტაცია იმ კუთხით, რომ მერაბიშვილი მიიმალებოდა ან მოწმეებზე გავლენას იქონიებდა.
