ბათუმის შოთა რუსთაველის სახელმწიფო უნივერსიტეტში გამართულ ღონისძიებაზე შშმ პირებმა საკუთარი ნამუშევრები წარმოადგინეს, ასევე, მოეწყო პოეზიის საღამო.
როგორც "ბიბლუსის" მარკეტინგის სამსახურის უფროსმა თათა დგებუაძემ ჟურნალისტებს განუცხადა, მსგავსი ტიპის ღონისძიებებს "ბიბლუსი" ყოველთვის მხარში უდგას.
"ჩვენ დაგვიკავშირდნენ ბათუმიდან და გვაცნობეს, რომ ეწყობოდა შეზღუდული შესაძლებლობების მქონე ბავშვების ნამუშევრების გამოფენა და პოეზიის საღამო. ჩვენ ყოველთვის მხარში ვუდგავართ მსგავსი ტიპის ღონისძიებებს. დღეს ბავშვებს გადავეცით წიგნები, რომელიც მათთვის, როგორც შემოქმედი ადამიანებისთვის, საინტერესო იქნება. ასევე, მოუწევთ ხელით მუშაობა და ისინი გაეცნობიან მსიოფლიო მხატვრების ნამუშევრებს", - აღნიშნა თათა დგებუაძე.
პროექტი "ხელოვნების ძალა" საზოგადოებრივი ორგანიზაცია "შეზღუდული შესაძლებლობების მქონე პირის უფლებებისათვის" და აიპი "აბროგაციის" ძალისხმევით მოეწყო.
როგორც შშმ პირის უფლებებისთვის ხელმძღვანელი თამაზ მჟავანაძე აცხადებს, მსგავსი ღონისძიება მნიშვნელოვანია იქიდან გამომდინარე, რომ შშმ პირთა შემოქმედებითი კუთხე წარმოჩინდეს. "გვყავს მოწვეული სტუმრები "ბიბლუსიდან", ბათუმის მერიისა და უნივერსიტეტისდან. შშმ პირები არიან ჩვეულებრივი ადამიანები და შესაძლებლობები შეუზღუდავია", - აღნიშნა თამაზ მჟავანაძემ.
