ბათუმში მიმდინარე შავი ზღვის ჯაზ ფესტივალზე ლივ ვორფილდის მაგივრად ნინო ქათამაძის კონცერტი გაიმართა. ფესტივალის ორგანიზატორი კომპანია „ისთერნ ფრომოუშენის“ დამფუძნებელმა კახა კანდელაკმა ჟურნალისტებთან საუბარში განაცხადა, რომ ავიარეისებთან დაკავშირებული ცვლილებების გამო შემსრულებლის და მისი გუნდის ბათუმში ჩასვლა ტექნიკურად ვერ მოხერხდა, რის გამოც პროგრამა შეიცვალა. ავიარეისებთან დაკავშირებული პრობლემა დონეცკში ჩამოვარდნილი ბოინგის გამო შეიქმნა. 

"ტექნიკურად შეუძლებელი იყო მათი ჩამოყვანა. გაგვიმართლა, რომ ნინო ქათამაძე ბათუმში იყო, ის ბათუმელია და პირველად გამოვიდა ჯაზ-ფესტივალზე", - განაცხადა  კანდელაკმა.

კონცერტის დასრულების შემდეგ ქათამაძემ განაცხადა, რომ კონცერტმა კარგად ჩაიარა.

"წვიმა ჩვენს კონცერტზე ყოველთვის მოდის, იმიტომ, რომ წვიმა და ვარსკვლავები მუსიკას უხდება. ბათუმი ჩემი სახლია, ჩემი დაბადებაა. იმდენი საყვარელი ისტორია მაქვს, რომელიც მუსიკასთან მიდის, რომ ნებისმიერი კონცერტი მაბრუნებს საწყის ემოციასთან. სცენაზე იდგა 22 მუსიკოსი და წარმოიდგინეთ რამხელა სურვილი იყო, რომ დღესასწაული ყოფილიყო ჩვენსა და მსმენელს შორის. ჩვენ ვასრულებთ სიმღერებს, რომლებსაც 20 წლის განმავლობაში ერთად ვმღერით. ეს ძალიან ძვირფასია, არ იმსახურებს შეფასებას, მხოლოდ სიყვარულს იმსახურებს", - განაცხადა  ნინო ქათამაძემ.

კონცერტში ქათამაძესთან ერთად ჯგუფი "ინსაითი", ანსამბლი "ჯორჯიან ბრასი" და ნიკოლოზ რაჭველი  მონაწილეობდნენ.