აუდიტის სამსახურის ხელმძღვანელი ლაშა თორდია საპარლამენტო ანგარიშს მის უწყებასთან დაკავშირებით არ ეთანხმება. მისი თქმით, აუდიტის სამსახური უარყოფით შეფასებას არ იმსახურებს, შესაბამისად, პროკურატურაში გადასაგზავნიც არაფერია.
საქმე ეხება საპარლამენტო კომისიის მიერ მომზადებულ დასკვნას 2013 წლის საქმიანობასთან დაკავშირებით. დოკუმენტში ცალკეულ დარღვევებზეა საუბარი, რის გამოც, პარლამენტმა შესაძლოა, საქმეში პროკურატურის ჩართვის გადაწყვეტილება მიიღოს.
"ზოგადად, როდესაც სამუშაო რეჟიმში ვიხილავდით ანგარიშს, რომელიც საპარლამენტო კომისიამ შეადგინა, უმეტეს მათგანს არ ვეთანხმებით, მით უმეტეს, პროკურატურაში გადაგზავნასთან დაკავშირებით. ჩვენ განსხვავებული მოსაზრება გვაქვს, საპროკურატურო იქ არაფერია. პირიქით, ყველა თანამშრომელს, რომელმაც 2013 წელს დაამტკიცა, რომ პროფესიონალები არიან, მადლობას ვუხდი. უარყოფით შეფასებას არ ვიმსახურებთ, თუმცა ვნახოთ რა გადაწყვეტილებას მიიღებს პარლამენტი. არის ტექნიკური ხასიათის შენიშვნებიც, რომელიც უკვე გათვალისწინებულია და არის რეკომენდაციები, რომლებიც ერთ და ორ დღეში არ გვარდება", - განაცხადა თორდიამ.
