ამერიკის შეერთებული შტატების სენატორების მიერ მიხეილ სააკაშვილთან დაკავშირებით გაკეთებულ განცხადებას, საპარლამენტო უმრავლესობის წევრი, ზაქარია ქუცნაშვილი გამოეხმაურა და განაცხადა, რომ საქართველოს ხელისუფლება ქვეყნის მომავალზე ფიქრობს, თუმცა, ჩადენილ დანაშაულებებს ლოგიკური პასუხები უნდა გაეცეს.
„შეშფოთება და მოწოდება, რომ ხელისუფლება მომავალზე უნდა ფიქრობდეს, სწორია. საქართველოს ხელისუფლება ყოველთვის იყო და იქნება ვალდებული, რომ საქართველოს მომავალზე იფიქროს, მაგრამ წარსული დანაშაულებებიც პასუხს მოითხოვს. ყველამ ვიცით, რომ ტელეკომპანია „იმედი" დაარბიეს, რომ შვიდ ნოემბერს ხალხი დაასახიჩრეს, ჯანმრთელობა დაუზიანეს და მოწამლეს. ისმის მარტივი კითხვა: ვინ არის ამაზე პასუხისმგებელი? ქართველმა ხალხმა იცის, ვინ არის ამაზე პასუხისმგებელი, აქედან გამომდინარე, სამართალი ამ კითხვებზე ლოგიკური პასუხების გაცემას მოითხოვს", - განაცხადა ზაქარია ქუცნაშვილმა.
