„ზამთრის სეზონზე გაიხსნება კურორტი "გოდერძი", სადაც რეგიონში ყველაზე გრძელი სათხილამურო ტრასა იქნება,“- განაცხადა საქართველოს პრემიერ-მინისტრმა ირაკლი ღარიბაშვილმა ბეშუმში, მოსახლეობასთან შხვედრისას.
პრემიერმა აჭარლებს შუამთობის სახალხო დღესასწაული მიულოცა და მათ სიტყვით მიმართა.
"მთაში ცხოვრება საკმაოდ რთულია, მაგრამ სიძნელეების მიუხედავად, თქვენ მუდმივად ადასტურებთ, რომ არ უშინდებით სირთულეებს, მედგრად დგახართ. მინდა, გამოვხატო განსაკუთრებული მადლობა მთლიანი აჭარის მკვიდრებისადმი მთის ერთგულებისთვის. ჩვენი მთავრობის ერთ-ერთი უპირველესი საზრუნავი სწორედ საქართველოს მთიანი რეგიონია. ჩვენ ვფიქრობთ, რომ ამ შემოდგომას მივიღებთ მთის კანონს, ვინაიდან ეს არის მართლაც გადაუდებელი საქმე მთის გაძლიერებისთვის. ჩვენ ვართ ვალდებული, რომ ცხოვრება შეგიმსუბუქოთ ყველას, განსაკუთრებით მათ, ვინც მთაში ცხოვრობთ. კარგად ვიცი, რომ ძალიან ბევრი პრობლემა გაწუხებთ. ეს პრობლემები წლების განმავლობაში დაგროვდა და ჩვენ ისინი თანადათანობით უნდა გადავჭრათ.
ყველაზე მთავარი პრიორიტეტი ჩვენი მთავრობისთვის, პირადად ჩემთვის არის, რომ სათანადო განათლება მიიღოს საქართველოს ყველა მოქალაქემ. ჩვენ ამისთვის ვაშენებთ და ავაშენებთ კიდევ მომავალში ბაგა-ბაღებს, დამატებით სკოლებს. თქვენთვის ძალიან მნიშვნელოვანია, რომ გაიხსნა ახალი ამბულატორიები, გაიზარდა სოფლის ექიმის ხელფასი და თქვენ უკვე აღარ მოგიწევთ ექიმთან მისასვლელად დიდი მანძილის გავლა. აქვე იმასაც გეტყვით, რომ ვინაიდან ბეშუმში საკურორტო სეზონზე ხალხმრავლობაა, 24-საათიან რეჟიმში მუშაობს სასწრაფო დახმარების ბრიგადა და ყველანი იქნებით მაქსიმალურად დაცულები", - განაცხადა ირაკლი ღარიბაშვილმა.
