იმერეთის რეგიონში, ქუთაისი-საფიჩხია-ჭოგნარის საავტომობილო გზის რეაბილიტაცია დასრულებულია. სამუშაოები საავტომობილო გზების დეპარტამენტის თავმჯდომარემ ვაჟა ფანჩულიძემ ჩაიბარა. გზის გახსნას მხარის გუბერნატორი ზაზა მეფარიშილი და მისი პირველი მოადგილე ალეკო იოსებაშვილი ესწრებოდნენ.
ქუთაისი-საფიჩხია-ჭოგნარის საავტომობილო გზის მონაკვეთი 25 წელზე მეტია, არ შეკეთებულა. ახალი რეაბილიტირებული 5 კილომეტრიანი მონაკვეთი 10-ზე მეტი სოფლის მოსახლეს ემსახურება, ასევე, გზა უკავშირდება ბაგრატის ტაძარსა და გელათის მონასტერს, ამიტომ ის ტურისტული დანიშნულების გზაც არის.
სახელმწიფო დაფინანსებით სარეაბილიტაციო სამუშაოები შპს „საქმილსადენმშენმა“ შეასრულა და მისმა ღირებულებამ 3 მილიონი ლარი შეადგინა. სამუშაოებზე 50-მდე ადგილობრივი მკვიდრი იყო დასაქმებული.
