საქართველოს პრემიერ-მინისტრი, ირაკლი ღარიბაშვილი დარიალის ხეობაში იმყოფებოდა.
ირაკლი ღარიბაშვილის განცხადებით, დარიალის ხეობაში სტიქიის შედეგად დაზიანებული გაზის მილის რეაბილიტაცია ხვალამდე დასრულდება.
როგორც პრემიერმა აღნიშნა, მეწყერის ჩამოწოლის შემდეგ მისი დავალებით შეიქმნა საგანგებო შტაბი.
„გაწმენდითი სამუშაოები ინტენსიურ რეჟიმში მიმდინარეობს და გაზის მილის რეაბილიტაცია ხვალამდე დასრულდება. ბევრი ადამიანის გადარჩენა მოხერხდა, თუმცა, სამწუხაროდ არიან გარდაცვლილები." - განაცხადა ღარიბაშვილმა.
ირაკლი ღარიბაშვილმა კრიზისების მართვის შტაბის წარმომადგენლებს კარგი მუშაობისთვის მადლობა გადაუხადა.
მთავრობის მეთაური სტიქიის ზონაში დღეს, სომხეთში ოფიციალური ვიზიტის დასრულებისთანავე ჩავიდა და მეწყრით დაზიანებულ ინფრასტრუქტურასა და მიმდინარე აღდგენით სამუშაოებს ადგილზე გაეცნო.
ირაკლი ღარიბაშვილმა ლარსის საბაჟო-გამშვები პუნქტი დაათვალიერა და დეტალური ინფორმაცია არსებული ვითარების შესახებ მინისტრებისა და სახელმწიფო უსაფრთხოებისა და კრიზისების მართვის საბჭოს ხელმძღვანელისგან მიიღო.
