საქართველოში საერთაშორისო საავტომობილო ტურის "მოგზაურობა ათიათასკილომეტრიან აბრეშუმის გზაზე" მონაწილეებთან დასკვნითი შეხვედრა ხვალ, ბათუმში, სასტუმრო "შერატონში" გაიმართება.
ბათუმში დაგეგმილი მიღება ტურის ყველაზე მასშტაბური ღონისძიებაა, სადაც საავტომობილო ტურის მონაწილეებს საქართველოს პრემიერ-მინისტრი, ირაკლი ღარიბაშვილი მიესალმება.
ღონისძიებაში ასევე მონაწილეობას მიიღებენ საქართველოს ვიცე-პრემიერი, ეკონომიკისა და მდგრადი განვითარების მინისტრი გიორგი კვირიკაშვილი, საგარეო საქმეთა მინისტრი მაია ფანჯიკიძე, სოფლის მეურნეობის მინისტრი ოთარ დანელია, რეგიონული განვითარებისა და ინფრასტრუქტურის მინისტრი დავით შავლიაშვილი, ასევე აჭარის მთავრობისა და საქართველოს ტურიზმის ეროვნული ადმინისტრაციის წარმომადგენლები. შეხვედრაზე მოწვეულნი არიან "აბრეშუმის გზის" ქვეყნების (ჩინეთი, ყაზახეთი, თურქეთი, იტალია და ა.შ.) ელჩები და საელჩოების წარმომადგენლები.
საავტომობილო ტური "მოგზაურობა ათიათასკილომეტრიან აბრეშუმის გზაზე" მასშტაბური კულტურულ-ეკონომიკური მედიაღონისძიებაა, რომელმაც სტარტი 2014 წლის 19 ივლისს ჩინეთის ქალაქ სიანში (ისტორიულად აბრეშუმის გზის სათავე) აიღო. საავტომობილო ტურის ინიციატორი ჩინეთის საგარეო საქმეთა და ინფორმაციის სამინისტროები არიან. ღონისძიებაში მონაწილეობენ ჩინეთის ცენტრალური ტელე-რადიო არხების, ბეჭდური მედიის, ინტერნეტგამოცემებისა და წამყვანი საინფორმაციო სააგენტოების ცნობილი ჟურნალისტები და გადამღები ჯგუფები. ისინი ყველა ქვეყანაში მოამზადებენ მასალებს (რეპორტაჟები, ინტერვიუები, სტატიები, პირდაპირი ტელეჩართვები და ა.შ.), რომლებიც ჩინურენოვან მოსახლეობას მიეწოდება მთელი მსოფლიოს მასშტაბით.
ექსპედიციის მონაწილეები "აბრეშუმის გზის" მარშრუტს გაივლიან - ჩინეთი, ყაზახეთი, ყირგიზეთი, რუსეთი, საქართველო, თურქეთი, საბერძნეთი, იტალია. ზემოჩამოთვლილ ქვეყნებს შორის დელეგაცია საქართველოში ყველაზე დიდხანს, 4 დღეს გაჩერდება და 24 აგვისტოს გაემართება თურქეთის მიმართულებით.
ექსპედიციის მონაწილეებმა საქართველოში მოინახულეს ლარსი-სტეფანწმინდა-თბილისი-მცხეთა-უფლისციხე-ქუთაისი და 24 აგვისტოს ქვეყანას სარფიდან დატოვებენ. ტურის ფარგლებში მათ მონაწილეობა მიიღეს სხვადასხვა კულტურულ ღონისძიებებში, დაათვალიერეს საქართველოს ღირშესანიშნაობები და ჩაწერეს სპეციალური ინტერვიუები საქართველოს ხელისუფლების წარმომადგენლებთან.
"მოგზაურობა ათიათასკილომეტრიან აბრეშუმის გზაზე" გაგრძელდება მომავალი ექვსი წლის განმავლობაში და ყოველწლიურად შეიცვლება ექსპედიციის შემადგენლობა, ჩამოვლენ სხვადასხვა სფეროს წარმომადგენლები.
