უმრავლესობის წევრი, ელისო ჩაფიძე, პროცესების მშვიდობიანად განვითარებისათვის , პრეზიდენს ურჩევს რაიმე კონსტრუქციული წინადადება მოიფიქროს და შეწყვიტოს ის საბოტაჟი და დავალებები, რომლებსაც ჯერ კიდევ მისივე დაქვემდებარებულ ბიზნესმენებს თუ პოლიტიკოსებს აძლევს,
„პრეზიდენტს არ დაუმალავს, რომ აპირებს ქართულ პოლიტიკაში დარჩენას. ვურჩევ რაიმე სასარგებლო საქმეს მიჰყოს ხელი. როგორც მახსოვს, გვპირდებოდა, მიწათმოქმედებას მიჰყოფდა ხელს და პომიდორს მოიყვანდა... ცუდი არ იქნება, თუ ამ საქმითაც დაკავდება." - აცხადებს ჩაფიძე.
უმრავლესობის წევრი მომავალში სააკაშვილის პრეზიდენტობის შესაძლებლობას გამორიცხავს.
„სრულ გარანტიას მოგცემთ, რომ მიხეილ სააკაშვილი ვერასდროს ვეღარ გახდება საქართველოს პრეზიდენტი. პრეზიდენტი კი არა, შეიძლება პარლამენტარიც ვეღარ გახდეს, თუ პარტიული სიით არ იყრის კენჭს. ჩვენ, დღეს, ზუსტად ვიცით, რისი გაკეთების პოტენციალი გააჩნია მიხეილ სააკაშვილს და როგორ გამოიყენებდა ის ძალაუფლებას, ხელში რომ ჩავარდნოდა" - აცხადებს ჩაფიძე.
ცნობისთვის, პრეზიდენტი, მიხეილ სააკაშვილი, ყვარელში, საკუთარ სახლში საკონფერენციო დარბაზს აკეთებს და საპრეზიდენტო პოლიტიკური ცენტრის შექმნას გეგმავს. ამის შესახებ პრეზიდენტმა გადაცემ „ნანუკას შოუში" განაცხადა და ხაზგასმით აღნიშნა, რომ მიუხედავად ამ გეგმებისა, აქტიურ პოლიტიკაში რჩება.
