„ვადამდელი საპარლამენტო არჩევნების ჩატარება არ არის დამოკიდებული ჩვენს ნება-სურვილზე. ის, რომ რიგგარეშე საპარლამენტო არჩევნები დაინიშნოს, ამისთვის აუცილებელი წინაპირობაა საჭირო", - განუცხადა „რეპორტიორს", იურიდიული კომიტეტის თავმჯდომარემ, ვახტანგ ხმალაძემ. როგორც მან განმარტა, ვადამდელი საპარლამენტო არჩევნები შეიძლება ორ შემთხვევაში დაინიშნოს - „თუ პარლამენტმა მთავრობას უნდობლობა გამოუცხადა და ეს ბოლომდე ვერ მიიყვანა, პრეზიდენტს შეუძლია პარლამენტი დაითხოვოს, თუმცა დღეს ვერ ვხედავ იმის მიზეზს, რომ მთავრობას უნდობლობა გამოვუცხადოთ. ასევე, შესაძლებელია ვადამდელი საპარლამენტო არჩევნების დანიშვნა, თუ საპარლამენტო უმრავლესობა და მთავრობა ხელოვნურად შექმნის ისეთ ვითარებას, რომ პარლამენტი დაითხოვონ. მაგალითად, არ დაამტკიცებენ ბიუჯეტს და ა.შ. დღესდღეობით კრიზის ნიშნები არ ჩანს, რომ ვადამდელი საპარლამენტო არჩევნები ჩატარდეს", - განაცხადა ხმალაძემ.
ექსპერტმა კახი კახიშვილმა პრესკონფერენციაზე რიგგარეშე საპარლამენტო არჩევნების ჩატარების აუცილებლობაზე ისაუბრა და აღნიშნა, რომ ცუდი არ იქნება, თუ საპრეზიდენტო კანდიდატებიც დააფიქსირებენ თავიანთ შეხედულებას რიგგარეშე საპარლამენტო არჩევნების შესახებ. ვადამდელი საპარლამენტო არჩევნების დანიშვნას ითხოვს არასამთავრობო ორგანიზაცია „ყოფილი პოლიტპატიმრები ადამიანის უფლებებისათვის."
