თბილისისა და ერევნის საერთაშორისო კინოფესტივალების ეგიდით, ახალი პროექტი -„კინოექსპრესი სომხეთი-საქართველო" ხორციელდება. პროექტი ექვსი უახლესი სომხური და ქართული ფილმის სამცხე-ჯავახეთსა და ჩრდილოეთ სომხეთში, შირაქისა და ლორის რეგიონებში ჩვენებას გულისხმობს.
„კინოექსპრესის" პრეზენტაცია ივლისში ერევნის საერთაშორისო კინოფესტივალზე შედგა. რამდენიმე კინოჩვენება უკვე გაიმართა ამასიაში, ნინოწმინდაში, ახალციხესა და ბორჯომში. ქართველი რეჟისორების ნამუშევრებიდან მაყურებელს საშუალება ექნება, იხილოს ზაზა ურუშაძის „მანდარინები", თინათინ ყაჯრიშვილის „პატარძლები" და რუსუდან ჭყონიას „გაიღიმეთ".
პროექტის შედეგები დეკემბერში, თბილისის მე-15 საერთაშორისო კინოფესტივალზე შეჯამდება.
„კინოექსპრესს" ახორციელებენ კინოს განვითარების ფონდი „ოქროს გარგარი"(სომხეთი) და კინოხელოვნების ცენტრი „პრომეთე"(საქართველო). პროექტის პარტნიორები არიან: ჰაინრიხ ბიოლის ფონდის სამხრეთ კავკასიის ოფისი, საქართველოს კულტურისა და ძეგლთა დაცვის სამინისტრო და სომხეთის კულტურის სამინისტრო.
