მცხეთის რაიონის სოფელ ძველ ქანდაში მდებარე ღვთისმშობლის მიძინების სახელობის ტაძარში დღეს წირვა-ლოცვა აღევლინა. მისი უწმინდესობის სრულიად საქართველოს კათოლიკოს-პატრაირქის ლოცვა-კურთხევით ტაძარს მესტიისა და ზემო სვანეთის მიტროპოლიტი მეუფე ილარიონი ეწვია. იოანე ოქოპირის საღვთო ლიტურგია ქართულ და არამეულ ენებზე მეუფე ილარიონმა და ღვთისმშობლის მიძინების სახელობის ტაძრის წინამძღვარმა სქიმარქიმანტრიტმა სერაფიმემ აღავლინეს.
სოფელი ძველი ქანდა საქართველოში ასირიელების მართლმადიდებლური ცენტრია. აქ 2000-ზე მეტი მართლმადიდებელი ასირიელი ცხოვრობს. სოფლის მოსახლეობის უდიდესი ნაწილი ღრმა რწენითა და რელიგიურობით გამოირჩევა.
სოფელ ძველ ქანდაში ბოლო პერიოდში მორწმუნეთა რიცხვი იმდენად გაიზარდა, რომ მისი უწმინდესობის ილია მეორის ლოცვა-კურთხევითა და მამა სერაფიმეს დიდი ძალისხმევით 13 წმინდა ასურელი მამის სახელობის ტაძარი აშენდა. როგორც მამა სერაფიმე ამბობს, ტაძრის მშენებლობაში განსაკუთრებული წვლილი მიუძღვის სოფლის მოსახლეობას.
მამა სერამფიმეს ღვაწლსა და დიდ ძალისხმევაზე ისაუბრა მეუფე ილარიონმა. მან მადლობა გადაუხადა ტაძრის წინამძღვარს გაწეული შრომისათვის და მრევლთან ერთად დალოცა. ასირიელები ქანდაში უწმიდესისა და უნეტარესის ჩაბრძანებაზე ოცნებობენ.
