„სარკე სტუდიამ"  წარმატებული პროექტის „ფარენჰეიტი 247" შემდეგ ახალი ფილმი „ნაღმი" გადაიღო.

„ნაღმი" სამი ამერიკელის ისტორიას მოგვითხრობს. მეგობრები ლაშქრობაში ტყეში მიდიან, სადაც ერთ-ერთი მათგანი ნაღმს დაადგამს ფეხს. ის უძრავად უნდა იდგეს, წინააღმდეგ შემთხვევაში აფეთქდება.  როგორ განვითარდება მოვლენები, ამას მაყურებელი ფილმის ნახვისას შეიტყობს.

ფილმში მთავარ როლებს ქართველი და უცხოელი მსახიობები ასრულებენ: კოტე თოლორდავა, სტერლინგ ნაითი, სპენსერ ლოქი, დეინ დაგერი, გიორგი ცაავა და ნანა კიკნაძე. ფილმის ბიუჯეტი 700 000 დოლარია.

 ფილმი რეჟისორ ლევან ბახიასა და „სარკე სტუდიის" ერთობლივი ნამუშევარია.  ავტორები „ნაღმის"  გაგზავნას სანდენსის კინოფესტივალზე აპირებენ.

„ნაღმამდე" სტუდიამ „ფარენჰეიტი 247" გადაიღო, რომელმაც რამდენიმე ფესტივალის ჯილდო დაიმსახურა და შემქმნელებს კომერციული მოგებაც მოუტანა.

„სარკე სტუდია" ოსკაროსანი რეჟისორის მიშელ ჰაზანავიჩუსის ფილმის „ძიება" კო-პროდიუსერიცაა.

„ნაღმი" თბილისის კინოეკრანებზე 23 ოქტომბერს გამოვა.