თუმანიშვილის კინომსახიობთა თეატრში ფესტივალ „საჩუქრის“  პრესკონფერენცია გაიმართა, რომელსაც ფესტივალის სტუმარი, ერთ-ერთი მნიშვნელოვანი სპექტაკლის „რადიო მაკბეტის“ რეჟისორი ენ ბოგარტი ესწრებოდა.

 ენ ბოგარტი მსოფლიოში ცნობილი ამერიკელი რეჟისორია, რომელმაც ტადაში სუზუკისთან ერთად 1992 წელს კომპანია „სიტი“ დაარსა. კომპანიის დადგმამ „რადიო მაკბეტი,“ უილიამ შექსპირის მიხედვით, მსოფლიო აღიარება მოიპოვა.  წარმოდგენის დაწყებისას მაყურებელი ვერც ხვდება, რომ ეს „მაკბეტია“, მსახიობები თამაშს ისე იწყებენ, თითქოს რადიოდადგმა იყოს: „საკმარისია, ტექსტს ყურადღებით მოუსმინოთ, და ამ ყველაფერს ისედაც დაინახავთ გონების თვალით. მინდოდა, ჩემი აუდიტორია უბრალოდ ჩაბნელებულ დარბაზში მჯდარიყო და ჩასწვდომოდა ამ ნაწარმოების არსს. ამის შემდეგ დამსწრეთა ფანტაზია აუცილებლად თავადვე წარმოსახავდა ყველა ბატალურ სცენას“, - ამბობს ენ ბოგარტი.

სპექტაკლი „რადიო მაკბეტი“ 17 და 18 ოქტომბერს თუმანიშვილის კონომსახიობთა თეატრში გაიმართება.

როგორც ენ ბოგარტმა „რეპორტიორთან“ საუბრისას განაცხადა, მისთვის ძალიან სასიამოვნოა ფესტივალზე სტუმრობა: „ცოტა ხანია, რაც აქ ვარ, მაგრამ უკვე შემიძლია გითხრათ, რომ ძალიან მომწონს აქაურობა. სასიამოვნოა, უამრავ მაყურებელს შენი სპექტაკლი წარუდგინო. ეს პროცესი თითქოს მასაჟს ჰგავს - მაყურებელი მსახიობების მოძრაობით, ხმით სხვა სამყაროში გადადის“.