რჩევები მშობლების, პედაგოგებისა და ბავშვებისთვის, ფილოლოგიის დოქტორმა და გამოცდილმა პედაგოგმა, ბატონმა გია მურღულიამ შეადგინა. წაიკითხეთ და გაითვალისწინეთ.

5 რჩევა მშობლებს:

1. ნუ იცხოვრებთ თქვენი შვილების ნაცვლად;

2. იყავით მათთვის არა მხოლოდ ადამიანური სიბრძნის მასწავლებლები, არამედ ამ სიბრძნის პრაქტიკულად განმასახიერებელნიც – ასწავლეთ პირადი მაგალითით;

3. ნუ დაუშლით თავისუფლებას, თუნდაც გარკვეულ რისკთან იყოს დაკავშირებული – ადამიანი მარცხითაც სწავლობს;

4. ეცადეთ ყოველდღიურად ვითარდებოდეთ, მოსაწყენ ერთფეროვნებად არ იქცეთ საკუთარი შვილებისათვის;

5. გააცნობიერეთ:  შვილების სიყვარული მხოლოდ მათი მფარველობით კი არა, განვითარებაში ხელშეწყობით გამოიხატება.

5 რჩევა მასწავლებლებს:

1. გააცნობიერებინეთ უმთავრესი ღირებულებები და მათი ერთგულება;

2. ყოველთვის აჩვენეთ პირადი მაგალითი;

3. სჯობს ასწავლოთ ერთი რამ ათი სხვადასხვა კუთხით, ვიდრე ათი რამ – ცალმხრივად;

4. გიყვარდეთ თქვენი მოსწავლე – მიუხედავად ყველაფრისა. გახსოვდეთ, რომ თქვენც იყავით ბავშვები;

5. ისწავლეთ, რათა ასწავლოთ.

5 რჩევა მოსწავლეებს:

1. გაითვალისწინეთ, რომ თქვენ არაფერს აკეთებთ ისეთს, რაც თქვენს ასაკში (ან თუნდაც მერე) არ გაუკეთებიათ თქვენს მასწავლებლებს;

2. იცოდეთ, რომ ვინც არ სწავლობს დღეს, გაცილებით რთულად მოუწევს ამის გაკეთება ხვალ;

3. მთავარი წიგნების კითხვა კი არ არის, არამედ მათი სრულფასოვანი გაგება;

4. სკოლა თქვენთვის არის, ხოლო თქვენ – კეთილი საქმეებისთვის;

5. ეცადეთ, ყოველდღე აჯობოთ არა სხვებს, არამედ საკუთარ თავს.

( მოამზადა  ნინო  მჟავანაძემ )

( წყარო mshoblebi.ge )