კულტურის სამინისტროში თბილისის თანამედროვე ხელოვნების საერთაშორისო გამოფენა „არტისტერიუმთან" დაკავშირებით პრესკოფერენცია გაიმართა, რომელსაც საქართველოს კულტურისა და ძეგლთა დაცვის მინისტრის მოადგილე მანანა ბერიკაშვილი, თბილისის ისტორიის მუზეუმის წარმომადგენელი ლიკა მამაცაშვილი და „არტისტერიუმის" ორგანიზატორები - მაგდა გურული და ილიკო ზაუტაშვილი გაუძღვნენ.

 წელს  „არტისტერიუმი" 7 ნოემბერს გაიხსნება და 10 დღის განმავლობაში ფართო საზოგადოებას, მონაწილეებსა და სტუმრებს გამოფენათა ციკლსა და საგანმანათლებლო პროგრამას შესთავაზებს.

რიგით მე-7 „არტისტერიუმის" თემაა: „ჰიუსტონ, პრობლემა გვაქვს!" - ფრაზა აღებულია 1995 წლის ამერიკული ფილმიდან „აპოლო 13", რომელიც რეალურ ისტორიაზეა აგებული და მთვარეზე დაჯდომის მცდელობისას ერთ-ერთი მისიის დროს განვითარებულ მოვლენას ეხება.

„ჰიუსტონ, პრობლემა გვაქვს!" მონაწილეებს სხვადასხვა ხასიათის პერსონალური, მხატვრული, ფილოსოფიური, სოციო-პოლიტიკური თუ ეკოლოგიური პრობლემატიკის კვლევას და წარმოჩენას სთავაზობს.

გამოფენაში მონაწილეობას 105 მხატვარი იღებს მსოფლიოს სხვადასხვა ქვეყნიდან.

„არტისტერიუმი" 7 ნოემბერს თბილისის ისტორიის მუზეუმ „ქარვასლაში" ქართველი და საერთაშორისო მხატვრების გამოფენით გაიხსნება.