„ნაციონალები" საკრებულოსთან დაკავშირებით „ქართული ოცნების" გადაწყვეტილებას არ ეთანხმებიან. თბილისის საქალაქო სასამართლოში საკრებულოს წევრმა თემურ გრიგალაშვილმა და მასთან ერთად ფრაქცია „ნაცმოძრაობის" რამდენიმე წევრმა სარჩელი უკვე შეიტანეს. თემურ გრიგალაშვილი და საკრებულოს ყოფილი თავმჯდომარე მამუკა ახვლედიანი საკრებულოს სხდომას არალეგიტიმურად აფასებენ და 25 პირის მიერ მიღებულ გადაწყვეტილებას აპროტესტებენ.

სხდომის დასრულების შემდეგ მამუკა ახვლედიანმა ჟურნალისტებთან საუბრისას განცხადა, რომ სხდომა ძალისმიერი მეთოდებით ჩატარდა.

„სხდომა იყო სრულიად არალეგიტიმური. არსებობდა ძალიან ბევრი იურიდიული ლაფსუსი. ამ დეპუტატებს არ ჰქონდათ  სხდომის მოწვევის უფლება, მაგრამ გამოიყენეს ძალისმიერი მეთოდები.  ჩვენი ფრაქცია ამ სხდომის შედეგებს არ ცნობს.  თბილისის საკრებულოს თავმჯდომარის თანანმდებობაზე ირაკლი შიხიაშვილის  კანდიდატურას კატეგორიულად არ დაუჭერთ მხარს. კოალიცა „ქართულ ოცნებაში" არის გაუგებრობა და შეუთანხმებლობა. ფრაქციის ნაწილი შიხიაშვილის კანდიდატურას მხარს არ უჭერს. რამდენადაც ჩვენთვის ცნობილია, დაჩქარებული მეთოდებით უნდათ ამ გადწყვეტილების სისრულეში მოყვანა, რადგნა პრემიერ-მინისტრი ამ საკითხთან დაკავშირებით საქმის კურსში არ არის. ცდილობენ ფოსტფაქტუმ გააცნონ მიღებული გადაწყვეტილება",- განცხადა საკრებულოს უკვე ყოფილმა თავმჯდომარემ, მამუკა ახვლედიანმა.

შეგახსენებთ, დღეს საკრებულოს რიგგარეშე სხდომაზე უმრავლესობის წევრებმა მამუკა ახვლედიანი თანამდებობიდან გადააყენეს.